Zemaj me njoftim të ri për veprimet ndaj atyre që nuk respektojnë masat

Ministri i Shëndetësisë, Armend Zemaj, është deklaruar rreth njoftimit të ri të masave preventive që do të merren ndaj përhapjes së mëtutjeshme të pandemisë Covid-19 në vendin tonë, shkruan Gazeta Metro.

Përmes një postimi në Facebook, Zemaj ka shkruar se Inspektorët sanitar të Agjencisë së Ushqimit dhe Veterinarisë së Kosovës (AUVK), dhe Inspektorët Komunal do të veprojnë me forcën e ligjit kundër atyre që nuk respektojnë masat parandaluese dhe rregullat kundër koronavirusit.

Ai tutje ka bërë të ditur se rekomandimet parandaluese për Covid-19, të Institutit Kombëtar të Shëndetësisë Publike të Kosovës, përfshijnë 22 masa të veçanta, të cilat duhet të respektohen.

“Do të veprojmë me forcën e ligjit!

Inspektorët sanitar të Agjencisë së Ushqimit dhe Veterinarisë së Kosovës (AUVK) dhe Inspektorët Komunal do të veprojnë me forcën e ligjit kundër atyre që nuk respektojnë masat parandaluese dhe rregullat kundër Covid-19.

Rekomandimet parandaluese për Covid-19 të IKSHPK përfshijnë 22 masa të veçanta, që patjetër duhet të respektohen.

Pikërëndesë kryesore është se BARTJA E MASKAVE TË JETË OBLIGATIVE.

Masa të tjera të veçanta që parashihen janë edhe: distanca fizike, dezinfektimi, ajrosja e lokaleve, higjiena, dhe masa të tjera të detajuara për punonjësit, zyrat, institucionet dhe bizneset.

Inspektorët përkatës në terren çdo ditë do të zbatojnë Ligjin për Inspektoratin dhe Ligjin për parandalimin e sëmundjeve ngjitëse dhe do të merren masa përgjegjëse në rast të mos zbatimit eventual të rekomandimeve të Institutit Kombëtar.

Çdo shkelje e rregullave nga kushdo qoftë që do të konsiderohet rrezikim i shëndetit dhe jetës së të tjerëve.

Dhe do të merr përgjigjen ligjore”, thuhet në njoftimin e Zemajt. /