Gjykata në Podujevë që nga reduktimi i aktiviteteve të saja ka pranuar 546 padi civile

Që nga shfaqja e rasteve të para me koronavirus në Kosovë e deri në fund të prillit, Gjykata Themelore në Prishtinë, dega në Podujevë, ka pranuar 546 padi civile.

Të gjitha këto padi, nga 13 marsi e deri më 30 prill 2020, janë pranuar nga referenti përgjegjës i stafit kujdestar të gjykatës në fjalë, Artan Rrahmani, raporton “Betimi për Drejtësi”.

I kontaktuar nga “Betimi për Drejtësi”, Rrahmani ka njoftuar se që nga reduktimi i aktiviteteve të gjykatës, sipas vendimit të Këshillit Gjyqësor të Kosovës (KGJK), vazhdimisht janë duke pranuar padi civile.

“Që nga 13 marsi deri me 30 prill kemi pranuar gjithsej 546 padi civile”, ka deklaruar ai.

Ndryshe, pas konfirmimit të rasteve të para pozitive me koronavirus në Kosovës, Këshilli Gjyqësor i Kosovës (KGJK)  kishte marrë vendim për reduktimin e të gjitha aktiviteteve në kuadër të KGJK-së dhe atyre të Gjykatave të Kosovës.

Përmes një njoftimi, KGJK kishte bërë të ditur se kryetarët e gjykatave duhet të caktojnë  gjyqtarët dhe stafin administrativ të mjaftueshëm për të kujdestaruar dhe realizuar vetëm veprimtaritë e natyrës urgjente.

“Ato të caktimit të masave për sigurimin e prezencës së të pandehurve-paraburgimit apo masave tjera, rastet e dhunës në familje, masave tjera si dhe rasteve tjera urgjente që eventualisht mund të paraqiten”, thuhej në njoftim.

Në këtë drejtim, vetëm gjatë kësaj jave, Gjykata në Podujevë ka trajtuar disa raste penale dhe civile të natyrës urgjente, mes të cilave dy kërkesa për caktimin e masave së paraburgimit, një seancë fillestare për të akuzuarën e cila gjendej në paraburgim, kundër së cilës është shqiptuar burgim efektiv, si dhe një urdhër mbrojtjeje. /BetimipërDrejtësi