Gjashtë të lënduar në aksidentin në Bradash, flasin dëshmitarët dhe policia

Gjashtë persona kanë marrë lëndime trupore në aksidentin e ndodhur pasditen e sotme në fshatin Bradash të Podujevës.

Disa prej të lënduarve janë më rëndë e të cilët janë dërguar në Emergjencën e Podujevës, raporton IndeksOnline.

Dëshmitarët kanë thënë për IndeksOnline se të lënduarit mezi i kanë futur në autoambulancë ndërsa në njërën veturë thonë se kanë qenë prindërit me tre fëmijë të cilët kanë pësuar lëndime trupore.

Ndërsa nga policia thonë se në aksident kanë qenë të përfshira tri automjete.

Flora Ahmeti, zyrtare për informim në Policinë Rajonale të Prishtinës ka thënë për IndeksOnline se në vendin e aksidentit ndodhen pjesëtarët e njësitit të trafikut të cilët po merren me rastin.

“Sot rreth orës 15:00 në fshatin Bradash të Podujevës, ka ndodhur një aksident trafiku ku të përfshira kanë qenë tri automjete. Bazuar në të dhënat fillestare në këtë aksident janë lënduar 6 persona. Personat e lënduar janë dërguar për tretman mjekësor. Me rastin po merret njësiti i trafikut”, ka deklaruar ajo.