Edhe ish-ministrat e Financave refuzojnë ftesën e qeverisë Kurti: Jeni vonuar, s’keni legjitimitet

Të gjithë ish-ministrat e Financave të Republikës së Kosovës kanë refuzuar ftesën e ministrit në detyrë, Besnik Bislimi për të folur rreth ‘Pakos për Rimëkëmbjen e Ekonomisë’, me arsyetimin se Qeveri Kurti është vonuar me hapat e saj karshi pandemisë dhe krizës ekonomike që po shkaktohet në Kosovë.

Ish ministri i Financave dhe Ekonomisë, Haki Shatri deklaron për se nuk do të merr pjesë në këtë takim që do të mbahet të martën, pasi sipas tij, një iniciativë e tillë është e vonuar dhe nuk ka legjitimitet kjo qeveri.

Shatri iniciativën e ministrit Bislimi po e konsideron si gjest të mirë, por mendon se është e vonuar dhe jashtë kompetencave.

“Dje e kam marrë ftesën, nuk kam pas kohë ende me u përgjigj, por do t’i përgjigjem sot. Nuk do të marrë pjesë, sepse e konsideroj që kjo Qeveri nuk është kompetente me marrë vendime, ndërsa me propozua masa për një periudhë, e cila do të shtrihet tepër larg në kufijtë kohorë në fushën e veprimeve të saj. Është një qeveri e cila në kuvend është shkarkuar dhe është e obliguar me vepruar vetëm për nevoja emergjente”, thotë Shatri për Kosova Press.

Kryetari i bordit te Odës së Afarizmit të Kosovës, Skënder Krasniqi thotë se edhe pse është herët të vlerësohen dëmet e shkaktuar nga pandemia në ekonomi, fondi për rimëkëmbje duhet të jetë 1 miliardë euro.

“Mungesa e përllogaritës së dëmeve jep paragjykime, por në bazë të vendeve të rajonit fondi duhet të jetë deri në 1 miliardë për përkrahje në rimëkëmbjen ekonomike afatgjate. Mirëpo, kjo është një sfidë e qeverisë për të krijuar një fond të tillë. Për këtë fond besojmë se bashkë me të hyrat nga Bashkësia Ndërkombëtare, nga Banka Botërore, nga BREZH, nga Trusti, një pjesë edhe nga AKP-ja, që të përkrahet biznesit ashtu siç po bëjnë edhe vendet e rajonit për të dhënë një injeksion bizneseve, në mënyrë që këto të kenë një start shumë më të fuqishëm për rritje të eksportit, por edhe prodhimin vendor “, thotë Krasniqi.

Ndërsa, zëvendësministri i Ministrisë së Financave dhe Transfereve, Ilir Aliu thotë për KosovaPress, se kjo ministri është duke krijuar edhe një pako për rimëkëmbjen ekonomike, por sipas Aliut, fillimisht duhet të identifikohen ato industri të cilat kanë nevojë për mbështetje financiare me një fond që do të jetë më i lartë se ai emergjent.

Të ftuar në këtë takim konsultues rreth “Pakos për Rimëkëmbjen e Ekonomisë”, janë edhe ish-ministri Bedri Hamza, Avdullah Hoti, Besim Beqaj, Ahmet Shala dhe Ali Sadriu, si dhe guvernator i Bankës Qendrore të Kosovës, Fehmi Mehmeti, por që asnjë prej tyre deri tash nuk kanë konfirmuar pjesëmarrjen e tyre në këtë takim që pritet të mbahet të martën prej orës 10:00.