Kështu e arsyeton Liburn Aliu emërimin e anëtarëve të VV’së në borde: Aktivisti është person me të drejta të plota

Deputeti i Lëvizjes Vetëvendosje, Liburn Aliu e ka arsyetuar përmes një shkrimi në Facebook emërimin e anëtarëve të partisë së tij në bordet e përkohshme të tri ndërmarrjeve publike, raporton Gazeta Express.

Aliu thotë se aktivistin e Vetëvendosjes nuk ka të drejtë askush ta poshtrojë e se kanë të drejta të plota.

Sipas tij, as profesionistat nuk ka të drejtë t’i poshtrojë askush, teksa shton se kjo nuk e bën një person të pandjeshëm politikisht, netural dhe steril.

“Profesionisti është qytetarë në radhë të parë, ai ka të drejtë të anëtarësohet në çdo parti dhe për çdo ideal, pa patur nevojë të sakrifikojë punën e vet. Duke dënuar aktivistët me papunësi dhe duke dënuar profesionistet me depolitizim, përfundojmë me skizofreni ne diskutimin tonë publik, ku politikanët kërkojmë të jenë njerëz pa profesione, d.m.th. të paaftë, e ku profesionistët duhet të jenë të heshtur sepse s’duhet të mbajnë qëndrime politike, d.m.th. memecë”, ka shkruar Aliu.

Deputeti i LVV’së thotë se personat që dje janë emëruar në borde, ka vetëm pak muaj që janë bërë pjesë e Vetëvendosjes.

“Një gjë për fund, dy emrat e përmendur për punësim nën emërimin ”militantë” nuk qëndron. Konotacioni që i jepet fjalës militant për të sulmuar angazhimin në borde të përkohshme si profesionistë, të dy personave që pak muaj janë bërë pjesë e Lëvizjes është i pasinqertë”, ka shkruar ai./GazetaExpress/