Në Podujevë: 4 të infektuar, 1 i vdekur dhe 1 i shëruar

Në katër ka shkuar numri i personave që kanë dalë pozitivë në Komunën e Podujevës.

Pas tri rasteve të para, ku njëri ka vdekur, një është shëruar plotësisht dhe tjetri është lëshuar në shtëpi, më 28 mars pozitiv ka rezultuar edhe një grua nga qyteti i Podujevës. E njëjta kishte ardhur nga Italia para dy javësh bashkë me tre familjarë tjerë dhe po ashtu me një familje tjetër 3-anëtarëshe, me të cilën kanë lidhje farefisnore.

Megjithatë, epidemiologia në Qendrën Kryesore të Mjekësisë Familjare (QKMF) në Podujevë, Bedrie Rama, thotë se testet u janë bërë të shtatëve, por se vetëm kjo grua ka rezultuar pozitiv. Sipas Ramës, gjendja e kësaj pacienteje është e mirë dhe se nuk ka pasur nevojë të trajtohet në Klinikën Infektive të QKUK-së.

“Ky është rast i ri, por që ka ardhur prej Italisë, në qytetin e Podujevës. Ka ardhur diku para dy jave. Është me simptoma të lehta dhe është konstatuar se është pozitiv. Nuk kanë kërkuar ndihmë mjekësore, nuk kanë pasur ankesa, por kur ka ardhur ekipi nga Departamenti i Mikrobiologjisë nga Instituti Kombëtar i Shëndetit Publik për t’i testuar disa mjekë dhe infermierë, kemi bërë kërkesën, por edhe Instituti e ka pasur listën”, ka deklaruar Bedrie Rama. “4 anëtarë në një familje dhe 3 anëtarë në një familje tjetër janë testuar, vetëm një ka dalë pozitiv”.

Epidemiologia e QKMF-së thotë se edhe para se t’u merreshin mostrat, dy familjeve u kanë rekomanduar që të vetizolohen, në mënyrë që të mos e përhapin virusin në rast se janë pozitivë.

“Pacientja nga Podujeva, mund të them se nuk ka simptoma të sëmundjes hiç, ose i ka shumë të lehta. Është në shtëpi. Nuk e kemi pa të nevojshme me shkua në Klinikë, është me një trajtim me barna shumë të lehta, është izoluar në një dhomë. Jemi marrë vesh me familjarët, edhe më herët kanë qenë në një lloj karantine, por tash janë më të izoluar pas rezultimit pozitiv me virus”, ka thënë Rama.

Gazeta nuk ka arritur të kontaktojë gjatë ditës me familjen e pacientes që ka dalë pozitiv me koronavirus, por epidemiologia Bedrie Rama thotë të ketë marrë përgjigje nga kjo familje se u janë përmbajtur rekomandimeve të tyre edhe para se t’u bëheshin testet.

Rasti i parë pozitiv me COVID-19 në Podujevë ka rezultuar më 15 mars. 62-vjeçari nga fshati Dumnicë e Epërme e Podujevës që tashmë është shëruar plotësisht, kishte ardhur nga Italia më 5 mars nëpërmjet aeroportit ndërkombëtar “Adem Jashari”. I njëjti kishte infektuar edhe prindin e tij 82-vjeçar dhe motrën 54-vjeçare nga fshati Bradash. 82-vjeçari më 22 mars ka vdekur, duke shënuar kështu viktimën e parë në Kosovë si pasojë e koronavirusit dhe të vetmen deri tash.

Ndërkohë, 62-vjeçari është kthyer në shtëpi bashkë me motrën e tij, e cila pritet që t’i nënshtrohet testit edhe njëherë gjatë kësaj jave për të parë nëse është shëruar edhe ajo. Javën që shkoi, testit i janë nënshtruar edhe 10 veta nga stafi mjekësor i QKMF-së në Podujevë. Bedrie Rama thotë se të njëjtit kishin pasur kontakt me dy peronat nga fshati Dumnicë e Epërme dhe gruan nga fshati Bradash.

“Stafi mjekësor ka pasur dyshime minimale që ka pasur kontakt me personin e Dumnicës që tash ka ndërruar jetë dhe po ashtu me dy fëmijët e tij, personin e shëruar nga Dumnica dhe gruan nga Bradashi. Ka qenë kontakt që nuk ka pasur gjasa…, por për siguri kemi vendosur të testohen. Dhe të gjithë kanë dalë negativë”, ka thënë epidemiologia nga Podujeva. “Ajo (54-vjeçarja nga fshati Bradash v.j.) është mirë, gjendja e saj shëndetësore është stabile ka shkuar në Dumnicë bashkë me vëllain. Kjo ka me ba edhe një herë testin, nëse i del edhe herën tjetër negativ konsiderohet edhe kjo e shëruar”.

Tri fshatrat e Podujevës, Dumnicë e Epërme, Dumnicë e Poshtme dhe Llaushë vazhdojnë të mbesin në karantinë, edhe pse nënkryetari i Komunës së Podujevës, Nexhmi Rudari, ka kërkuar që kjo masë t’u hiqej.

Bedrie Rama thotë se ende nuk ka një vendim rreth kësaj çështje.

“Tri fshatrat vazhdojnë të jenë në karantinë. Zyrtarët komunalë kanë kërkuar me u liru nga karantina. Edhe na kemi shpreh dëshirën që është mirë vetëm lagjja me vazhdu me qenë në karantinë edhe shtatë ditë. Ndërsa, pjesa tjetër e fshatit dhe dy fshtrat tjera me u liru. Sot janë ba dy javë që nuk kemi rast të ri nga Dumnica. Por, ende nuk ka vendim, zyrtarët komunalë janë duke pritur përgjigje”, ka theksuar ajo.