Fetahu: Kujdesuni për veten tuaj sepse komuna e Podujevës dhe qeveria nuk e kanë ndërmend ta bëjnë

Kandidati i Partisë Demokratike të Kosovës për kryetar të Podujevës, Naim Fetahu ka shkruar në profilin e tij në facebook se qytetarët e Podujevës ta shtojnë kujdesin për vete dhe të qëndrojnë në shtëpi, pasi që  komuna dhe qeveria nuk e kanë ndërmend ta bëjnë. Fetahu thotë se “Nuk e kanë as dijen e më e keqja as prioritetin e tyre këtë gjë”.

Ky është shkrimi i tij:

Tashmë ka shkuar në tre numri i të prekurve me coronavirus në Podujevë. Duke parë përhapjen e tij në qytetin tonë, unë kërkoj edhe një herë që ju, të dashur bashkëqytetarë, të shtoni kujdesin dhe të qëndroni në shtëpi.

Kujdesuni për veten tuaj sepse komuna dhe qeveria nuk e kanë ndërmend ta bëjnë. Nuk e kanë as dijen e më e keqja as prioritetin e tyre këtë gjë.

Në një situatë kur kërkohet mobilizim i madh, e edhe shpallje e gjendjes së jashtëzakonshme në vendin tonë, kryeministri i vendit e shkarkon ministrin e Punëve të Brendshme .

Kjo e vërteton edhe një herë atë që kam thënë gjatë fushatës, se kjo Qeveri ka dallime të pakapërcyeshme dhe nuk do t’i sjellin asnjë të mirë vendit.

Madje, vetëm sa po e shtojnë panikën dhe pasigurinë e qytetarëve. Një Qeveri e tillë e cila shkakton kriza në vend se të merret me zgjidhjen e tyre, duhet të shkoj në shtëpi.

Panik Jo – Kujdes Po.