A do t’i “shembet” Podujeva si bastion LDK-së – flasin kandidatët për kryetar

Agim Veliu e lëshoi “fronin” në Podujevë.

Kjo bëri që atje të ketë garë të parakohshme zgjedhore, fushata e së cilës nis sot zyrtarisht.

Banorët e Llapit dhe një pjese të Gollakut do t’iu drejtohen kutive të votimit më 15 mars për të zgjedhur kryetarin e ri të kësaj komune.

Janë tre kandidatë që synojnë ta pasojnë Agim Veliun, i cili në Qeverinë e re ka marrë postin e ministrit të Brendshëm.

Zëvendësi i Veliut në institucionin e komunës deri tash, Nexhmi Rudari është i nominuari i LDK-së, ndërkaq janë vetëm Lëvizja Vetëvendosje me Shpejtim Bulliqin dhe PDK-ja me Naim Fetahun që do të synojnë ta “shembin” këtë bastion të LDK-së.

Rudari për klankosova.tv ka thënë se beson se qytetarët e Podujevës duke vlerësuar punën e bërë deri tash në këtë komunë do t’i besojnë atij dhe Lidhjes Demokratike të Kosovës, përsëri.

“Në fund të fundit Podujeva identifikohet me LDK-në dhe LDK identifikohet me Podujevën. Partitë të tjera nuk kanë arritur të kenë shtrirje dhe qëndrueshmëri në Llap sikur LDK”, është shprehur Rudari.

Ai ka deklaruar se bashkëqytetarët e tij nuk e kanë ndërruar LDK-në edhe kur nga ky subjekt ka pasur të tjerë kandidatë për të parin e komunës.

“Unë do të vazhdoj me punë të mira në shërbim të qytetarëve dhe LDK-ja në Podujevë ka fituar të gjitha zgjedhjet pa marrë parasysh se kush ka qenë kandidat, qoftë Agim Veliu, Agim Kika apo Ilaz Pireva”.

Sipas Rudarit pas 15 marsit, kur ai të marrë pozitën e kryetarit, vetëm do të vazhdohen projektet e parapara.

“Ne e kemi të miratuar buxhetin dhe projektet e komunës për vitin 2020 dhe vetëm do të vazhdojmë ta zbatojmë. Për vitin 2020 janë planifikuar mbi 24 milionë euro prej të cilave afër 7 milionë për investime kapitale, 660.000 euro subvendicone në bujqësi, mbi 2 milionë mallra dhe shërbime (dhe këto vetëm nga buxheti i komunës kurse janë paraparë edhe 400,000 euro për palestrën sportive dhe 200,000 euro për stadiumin e Llapit nga Ministria e kulturës dhe sportit,  por edhe shumë projekte të asfaltimit të rrugëve nga Ministria e Infrastrukturës (me buxhet shtesë dhe mbështetës për komunën)”.