Naim Fetahu: Bulliqi dhe Rudari, drejtorë të dështuar të Agim Veliut
Kandidati i Partisë Demokratike të Kosovës për kryetar të Podujevës, Naim Fetahu, mbrëmë në T7 ka thënë se dy kundërkandidatët e tij në garën zgjedhore, Shpëtim Bulliqi (VV) dhe Nexhmi Rudari( LDK), janë drejtorë të dështuar të Agim Veliut.
Këto komente, Fetahu, i bëri mbrëmë në emisionin DPT te Fidani në T7, ku tha se Shpëtim Bulliqi është uzurpator i pronës publike.
“Tē dy kundërkandidatët e mi për garën në Podujevë kanë qenë drejtor të dështuar të Agim Veliut. Për nuëzet vjet kanë punuar në komunë dhe qytetarët e kanë parë punën e tyre. Shpëtim Bulliqi nuk mund t’i shlyej të gjitha gabimet që ka bërë në komunë duke garuar për Vetëvendosjen. Ai është uzurpatorë i pronës komunale” tha ndër të tjera Fetahu.
Naim Fetahu foli edhe për kundërkandidatin tjetër nga LDK-ja, Nexhmi Rudarin, për të cilin tha se është vetëm një kukull dhe nuk mund të marrë vendime, e kësisoj ai është duke garuar për nënkryetar të komunës.
“Z. Rudari garon për nënkryetarë të komunës. Ai gjithçka tjetër mund të jetë por jo kryetar, ai është një kukull që qytetarët e Llapit e dinë se asnjë vendim nuk mund ta marrë” theksoi tutje Fetahu.
Kandidati nga PDK-ja, theksoi më tej se kundërkandidatët e tij të gjitha gjërat i kanë bërë së bashku sa kanë qenë në komunë dhe tash ato po i ndajnë me t’i hyrë garës për kryetarë.
Zgjedhjet në Podujevë mbahen më 15 mars, pasi kryetari i kësaj komune, Agim Veliu, dha dorëheqje për t’u emëruar në postin e ministrit të Punëve të Brendshme.
