Qeveria Kurti pritet të shkarkojë bordet e ndërmarrjeve publike

Albin Kruti siguroi karrigën e të parit të ekzekutivit më 3 shkurt të këtij viti, pasi Kuvendi i Republikës së Kosovës me 66 vota pro zgjodhi atë për ta drejtuar vendin për mandatin e ardhshëm, raporton Gazeta Online Veriu.info.

Bashkë me Kurtin erdhi edhe shpresa e madhe e qytetarëve të vendit për ndryshime të mëdha pozitive në shumë fusha jetësore.

Drejtësia dhe trajtimi i barabartë llogariten dy nga synimet kryesore të qeverisë së re, fenomene këto që qytetarët shprehen që nuk i kanë parë për këto 20 vite liri.

Konform kësaj, Gazeta Online Veriu.info mëson nga burimet e saj brenda ekzekutivit të ri se kryeministri Kurti pritet shpejtë të marrë vendimin për shkarkimin e bordeve të ndërmarrjeve publike qendrore.

Sipas këtij burimi ky vendim nga kryeministri Kurti pritet të merret shpejtë, për faktin se këto borde janë emëruar me anëtarë të partive politike duke i politizuar skajshmërisht bordet, duke bërë që anëtarët e tyre të ndjekin agjenda politike e jo menaxhuese për progres.

Vendimi i Kurtit prek bordet e ndërmarrjeve publike qendrore që janë kompetencë e nivelit qendror, por jo edhe bordet e ndërmarrjeve regjinale dhe lokale të cilat janë kompetencë e nivelit lokal, pra komunave respektive të Kosovës./Veriu.info./