Me kë do ta bëjë Albin Kurti betejën për Podujevën, këta janë emrat?

Që nga paslufta, Komuna e Podujevës nuk e ka pasur problemin e ndërrimit të pushtetit. Madje, Llapi njihet nga të gjithë si bastioni i Lidhjes Demokratike e Agim Veliut që pak ditë më parë u emërua ministër dhe e çoi vendlindjen e tij në zgjedhje të jashtëzakonshme, pa e përfunduar mandatin e tretë.

Por, kësaj here problem duket se do të ju dalë me partnerin në qeveri, Vetëvendosjen, parti me të cilën kishin qenë afër me rezultat edhe në zgjedhjet e jashtëzakonshme.

Bindshëm kishte fituar në zgjedhjet komunale të vitit 2017-të Agim Veliu në Podujevë, duke ia siguruar vetes mandatin e tretë në krye të kësaj komune.

Mirëpo, lideri i Llapit e la mandatin në gjysmë për t’u bërë ministër i Punëve të Brendshme, në qeverinë e udhëhequr nga Albin Kurti. Kështu, Podujeva do të shkojë në zgjedhje të jashtëzakonshme, tash kur edhe zyrtarisht qyteti po udhëhiqet nga nënkryetari, e Veliu e ka dorëzuar dorëheqjen.

Derisa Lidhja Demokratike e Kosovës nuk e ka bërë publik ende emrin që do të kandidojnë për kryetar të kësaj komune, e shprehen të bindur se do ta ruajnë bastionin e tyre të përhershëm, tashmë kanë nisur të qarkullojnë emrat e personave që mund të jenë potencialisht kandidat për kryetar të komunës nga partia e udhëhequr nga Lëvizja Vetëvendosje.

Me këta të fundit, në zgjedhjet e jashtëzakonshme të 6 tetorit, LDK-ja arriti të fitojë me rezultat të ngushtë, me vetëm 2 mijë vota më shumë.

LDK-ja doli si parti e parë në Podujevë me 15,094 vota, ndërsa, LVV mori 13,927 vota.

Si emër potencial po përflitet ish-anëtari i Lidhjes Demokratike të Kosovës, Shpejtim Bulliqi, që tashmë është deputet i Lëvizjes Vetëvendosje.

I kontaktuar nga Gazeta Express, Bulliqi thotë se në partinë në të cilën ai bën pjesë ka mjaftueshëm kandidat të përgatitur për të udhëhequr këtë komunë, e që emri i kandidatit do të diskutohet në organet e subjektit.

“Unë besoj që LVV-ja ka mjaftueshëm kandidatë të përgatitur për të udhëhequr me komunën e Podujevës. Së shpejti kjo do të diskutohet në organet e subjektit tonë për emrin që do të jetë kandidat për kryetar komune, momentalisht ka vetëm spekulime dhe së shpejti organet e LVV do të mblidhen në qendrën tonë për të diskutuar këtë çështje”, thotë Bulliqi.

Emër tjetër që po përflitet është edhe deputetja e Lëvizjes Vetëvendosje, Saranda Bogujevci. Bogujevci që është deputete që disa mandate, e pyetur nga Gazeta Express nuk ka pranuar që të tregojë nëse preferon të lëshojë pozitën e deputetes për të hyrë në garë për kryetare të Komunës.

Sido që të jetë, emri që do të propozojë LV-ja për kandidat në zgjedhje, mbetet që të vendoset në organet e partisë.

Në Lëvizjen Vetëvendosje deklarojnë që pas vendimit për shpallje të zgjedhjeve do të marrin vendim edhe për kandidatin që do ta propozojnë për zgjedhjet komunale në Podujevë.

“Pas një vendimi që do të merr KQZ sipas procedurave të parapara për shpalljen e zgjedhjeve nëpër komunat e Kosovës Lëvizja VETËVENDOSJE! sigurisht se do të vendos edhe për zgjedhjet dhe kandidatin e saj adekuat.

Pra jemi në pritje të procedurave formale dhe vetëm pastaj qendra përkatëse e Lëvizjes në Besianë në koordinim edhe me organet e tjera të Lëvizjes përbrenda afateve do të vendosin”, kanë deklaruar nga Vetëvendosje në një përgjigje për Gazetën Express.

Mirëpo, për të ju hapur rrugë të dy partive që të fillojnë seriozisht të mendojnë se kë do të kandidojnë për kryetar të Komunës, hapin e parë duhet që ta bëjë presidenti i vendit, Hashim Thaçi, që duhet të bëjë shpalljen e zgjedhjeve të jashtëzakonshme.

Sipas ligjeve në fuqi, shpallja e zgjedhjeve të jashtëzakonshme duhet të bëhet jo më larg se 10 ditë pas dorëheqjes. Në presidencë nuk e kanë sqaruar se kur do të vendos Thaçi.

Në anën tjetër se janë në pritje të presidentit kanë deklaruar edhe në Komisionin Qendror të Zgjedhjeve.

Zëdhënësi i KQZ-së, Valmir Elezi i ka thënë Gazetës Express se sapo të shpall zgjedhjet presidenti do të fillojnë përgatitjet.

“Komisioni Qendror i Zgjedhjeve fillon me përgatitjet e një procesi të jashtëzakonshëm zgjedhor vetëm pasi të shpallet ai nga ana e Presidentit të Kosovës. – Një ndër vendimet e para të KQZ-së kur shpallen zgjedhjet e jashtëzakonshme është shkurtimi i afateve kohore të aktiviteteve zgjedhore duke i përshtatur me ditët që janë në dispozicion për organizimin e tyre.

– Nga dita e sotme, e enjte, KQZ-ja është në kapacitete të plota për të kryer detyrat kushtetuese dhe ligjore, pasi janë emëruar anëtarët e rinj”, ka deklaruar Elezi, duke sqaruar se viti 2020 nuk është vit zgjedhor dhe për çfarëdo procesi të mundshëm zgjedhor gjatë këtij viti, KQZ-ja nuk ka mjete të planifikuara për zgjedhje.

Podujeva është komuna e vetme që ka shkuar në zgjedhje të jashtëzakonshme, pasi që vetëm Agim Veliu është emëruar ministër në qeverinë Kurti. Zgjedhjet e rregullta komunale do të mbahen në vitin 2021.