Zgjedhjet e jashtëzakonshme në Podujevë: KQZ deklarohet rreth kësaj çështje

Komisioni Qendror i Zgjedhjeve (KQZ), ka reaguar në lidhje me zgjedhjet e jashtëzakonshme për kryetar të ri të Podujevës, pasi që kryetari i deritashëm Agim Veliu, është zgjedhur Ministër i Punëve të Brendshme të Qeverisë që u votua dje në seancën e Kuvendit të Kosovës, shkruan Gazeta Metro.

Zëdhënësi i KQZ’së, Valmir Elezi, në një përgjigje për Gazetën Metro, ka deklaruar në lidhje me procesin e jashtëzakonshëm zgjedhor që pritet të shpallet së shpejti sa i përket kësaj komune, process ky për të cilin Elezi thotë se deri më tani nuk kanë marrë ndonjë njoftim në lidhje me këtë çështje, mirëpo KQZ fillon me përgatitje intensive pasi të shpallet data e zgjedhjeve.

“E kemi shpjeguar edhe në rastet e kaluara të ngjashme, pra në rrethana të zgjedhjeve të jashtëzakonshme, KQZ-ja fillon me përgatitjet intensive pasi të shpallet data e zgjedhjeve”, ka thënë Elezi për Gazetën Metro.

Elezi tutje ka shtuar se institucioni të cilin e përfaqëson nuk ka mjete të planifikuara për zgjedhje, ndërkaq posa të bëhet planifikimi dhe kërkesa buxhetore, përcillet në Qeverinë e Kosovës.

“Viti 2020 nuk është vit zgjedhor. Pra për çfarëdo procesi të mundshëm zgjedhor gjatë këtij viti, KQZ-ja nuk ka mjete të planifikuara për zgjedhje. Ashtu siç kemi vepruar edhe në të kaluarën, pra në raste të ngjashme, KQZ-ja bën planifikimin dhe kërkesën buxhetore e përcjellë në Qeverinë e Kosovës”, ka deklaruar tutje Elezi.

Kujtojmë se gjatë ditës së sotme ka nisur procesi i pranim-dorëzimit të posteve ministrore, ku kryetari i Podujevës, Agim Veliu pranoi pozitën e ministrit të brendshëm nga ish-ministri Ekrem Mustafa.