Veliu e çon Podujevën në zgjedhje të parakohshme, brenda 45 ditë zgjedhet kryetari i ri

Kryesia e LDK-së ka miratuar edhe listën me gjashtë ministrat e kësaj partie që do të jenë pjesë e qeverisë Kurti.

Por ajo që ndoshta nuk e ka pritur askush, është emërimi i Agim Veliut për ministër të Brendshëm, edhe për faktin se ai është kryetar aktual i Komunës së Podujevës.

Për të sqaruar situatën se çfarë bëhet me komunën e Podujevës, veç nëse Veliu nesër edhe zyrtarisht zgjedhet ministër, Reporteri.net ka biseduar me Besnik Muçaj nga Instituti Kosovar për Qeverisje Lokale.

Ai thotë se në momentin që e pranon pozitën e ministrit, Veliu duhet të jape dorëheqje nga pozita e kryetarit të Podujevës dhe ky qytet brenda 45 ditësh mban zgjedhjet e reja ku zgjidhet kryetari.

“Duhet të japë dorëheqjen, dhe me këtë përfundon mandati dhe mandej shkohet në zgjedhjet e parakohshme. Brenda 30-45 ditësh mbahen zgjedhjet e reja. Kuvendi nuk shkon në zgjedhje, në zgjedhje shkohet veç për kryetar. Mandati i kryetarit të ri është deri në zgjedhjet tjera, pra jo mandat i plotë”, ka thënë Muçaj për Reporteri.net.

Kujtojmë se ligji nr.03/L-040 për vetëqeverisjen lokale tregon se kur përfundon mandati i kryetarit të komunës.