Podujevës i “avullohet” sinjalizimi

Sinjalizimi horizontal në rrugën kryesore të qytetit të Podujevës ka filluar të “avullohet” një javë pasi është vendosur. Në këtë rrugë, që mban emrin e heroit Zahir Pajaziti, është bërë zgjerimi dhe është ndërtuar infrastruktura përcjellëse.

Këto ditë është bërë edhe sinjalizimi vertikal dhe ai horizontal. Por, këtij të fundit menjëherë i ka “dalë boja”. Vendkalimet për këmbësorë vërehen shumë pak, pasi ngjyra pothuajse ka “humbur”, shkruan sot “Koha Ditore”.

Zyrtarët e partisë opozitare në këtë komunë, PDK, thonë se punimet në këtë rrugë janë bërë shkel e shko. Këshilltari i saj, Rafet Llapashtica, akuzon komunarët për paaftësi.

“Sa u përket planifikimeve dhe kryerjes së punëve në rrugën ‘Zahir Pajaziti’ nga ana e Komunës së Podujevës besoj se është e tepërt edhe të diskutohet. Sa e sa herë kjo rrugë u shtrua e pastaj u shkatërrua nga kjo qeverisje pa plan. Sa mjete shkuan dëm nga paaftësia e tyre, apo nga dëshira e keqpërdorimit financiar. Kryerja e punëve shkel e shko në këtë projekt të kësaj rruge shihet në çdo situacion. Sinjalizimi horizontal i vendosur para pesë ditëve veç ka filluar të shlyhet”, është shprehur Rafet Llapashtica.