Deputeti i VV’së tregon pse po vonohet koalicioni: Nuk duam të rahatojmë askënd në ministri e poste

Deputeti i Lëvizjes Vetëvendosje, Hekuran Murati, ka thënë se Vetëvendosje po e vonon koalicionin pasi nuk insiston në ministri e poste për të rehatuar emra të përveçshëm.

Përmes një shkrimi në rrjetin social Facebook, ai ka thënë se VV nuk e ka qëllimin vetëm te pushteti.

“Ne nuk insistojmë në ministri e poste për të rehatuar emra të përveçëm. Por për shkak të funksionit që ato poste bartin, e që janë kruciale drejt përmbushjes së obligimeve që kemi marrë karshi votuesve”, ka shkruar ai.

Postimi i plotë:

Ne nuk insistojmë në ministri e poste për të rehatuar emra të përveçëm.

Por për shkak të funksionit që ato poste bartin, e që janë kruciale drejt përmbushjes së obligimeve që kemi marrë karshi votuesve.

Se nuk e kemi për poste e pushtet, besoj u vërtetua me emrat e kabinetit Kurti.

Synimi ynë është që të krijojmë një qeveri e cila është funksionale dhe nxjerr vendin nga humnera.

Çdo ngutje dhe lëshim pe në këtë aspekt, e zhbën edhe vetë qëllimin e fitores së 6 tetorit.

E kuptoj se shumë prej jush e prisni me padurim krijimin e qeverisë së re. Të gjithë po e presim.

Por nuk duhet që dëshira e sinqertë për formim sa më të shpejtë të qeverisë të na nxitojë drejt një marrëveshjeje të keqe.