LDK: Negociata, jo Vetëvendosje

Gjatë mbrëmjes së sotme liderët e partive që pritej të arrinin marrëveshje dhe të formoni qeverinë, shkëmbyen akuza ndaj njëri tjetrit, duke deklaruar se një marrëveshje e tillë nuk është afër të ndodhë. I pari i Vetëvendosjes Albin Kurti, fajësoi LDK’në për dështimin e marrëveshjes ndërsa Isa Mustafa, tha se duhen negociata dhe jo të vendos Vetëvendosja, shkruan Gazeta Metro.

Isa Mustafa e vlerësoi këtë si pazar të VV’së për të përfituar diçka më shumë në hisen e pushtetit, duke thënë haptas se do të ketë negociata dhe jo Vetëvendosje.

“LDKja dhe unë do të vazhdojmë të punojmë për ta bërë ndryshimin e kërkuar nga qytetarët e Kosovës më 6 tetor. Natyrisht, jo duke shpërfillur përpjekjet për ta lënë LDK-në fajtore për ambiciet përtej legjitimitetit qytetar të Lëvizjes Vetëvendosje”, ka shkruar Mustafa në Facebook.

Ndërsa, Kurti kishte fajësuar LDK’në se nuk i ka pranuar ofertat e tij, dhe kështu ka dështuar marrëveshja e shumëpritur.

“Oferta ime e parmbrëmshme e datës 23 dhjetor 2019 u refuzua dje. Ajo kishte tri pika dhe afatin deri në mesnatën e mbrëmshme. Dihet se LVV si parti e parë i takon kryetari i Kuvendit dhe nënkryetari i parë, LDK i takon nënkryetari i dytë. Le të bëjmë rokadën midis kryeparlamentarit dhe nënkryetarit të dytë dhe kësisoj LDK e ka kryeparlamentarin dhe LVV i ka dy nënkryetarët e Kuvendit”, tha Kurti në një video-mesazh të publikuar në rrjetin social Facebook.

Ndërsa, Mustafa e paraqiti më tej qëndrimin e LDK’së rreth përgjegjësive të balancuara dhe kjo formulë sipas tij do të sillte stabilitet qeverisës dhe shtoi se VV’ja ka filluar ta kuptoj këtë dhe se LDK’ja është e gatshme për negociata.

“Ne mendojmë se ndarja e balancuar e përgjegjësive, konform rezulatit të zgjedhjeve, rezulton në këtë formulë, Kryetari i Kuvendit, Presidenti, kur të mbetet pozita e lirë, dhe gjysma e qeverisë duhet t’i takojnë LDK’së, nëse Vetëvendosje dëshiron mbështetjen e LDK-së për t’ia besuar asaj drejtimin e ekzekutivit dhe gjysmën e Qeverisë.