VV-LDK në seancën konstituive të Kuvendit të Kosovës do të shkojnë pa marrëveshje

Lëvizja Vetëvendosje dhe Lidhja Demokratike e Kosovës, me shumë gjasë do të shkojnë në seancën konstituive të Kuvendit të Kosovës, të enjten, pa marrëveshje për bashkëqeverisje.

Gazeta Veriu.info mëson se as të mërkurën në takimin e kreut të Vetëvendosjes, Albin Kurti, me deputetët e zgjedhur të kësaj partie nuk është gjetur zgjidhje për të tejkaluar pengesat për bashkëpunim me LDK-në.

“Nuk ka marrëveshje”, ka thënë shkurt, për gazetën një zyrtarë i lartë i Vetëvendosjes.

Sipas tij, LDK duhet të heqë dorë nga kërkesa për President në këtë fazë përndryshe VV është e gatshme të shkoj në zgjedhje.

Gjatë ditës së enjte nga ora 15:00 do të fillojë seanca konstituive e Kuvendi të Kosovës, kjo seancë pritet të kryesohet nga deputetit më i vjetër në moshë, Jahja Koka, shoqëruar nga deputeti më i ri, e që është, deputetja Fjolla Ujkani.

Formimi i Komisionit të përkohshëm për verifikimin e kuorumit dhe të mandateve të deputetëve, dhënia e betimit të deputetëve, zgjedhja e Kryetarit të Kuvendit dhe e nënkryetarëve të Kuvendit, janë pika të rendit të ditës.

Përkundër mbajtjes së seancës Lëvizja Vetëvendosje dhe Lidhja Demokratike e Kosovës akoma nuk kanë arritur të finalizojnë marrëveshjen për bashkëqeverisje./Veriu.info