VV-ja i përgjigjet LDK-së: Ofertën që e bëri sot Veliu, Kurti ia ofroi LDK-së para zgjedhjeve

Nënkryetarja e Vetëvendosjes, Fatmire Kollçaku, ka thënë sot se në takimin e djeshëm ndërmjet Albin Kurtit e Isa Mustafës për arritjen e marrëveshjes për koalicion qeverisës ka pasur avancim.

Ajo nuk ka komentuar deklaratat e nënkryetarit të Lidhjes Demokratike të Kosovës, Agim Veliu, për ndërrim rolesh në qeveri.

Por, VV-ja thotë se oferta e Veliut është përsëritje e propozimit të Kurtit, para zgjedhjeve.Nënkryetari i parë i LDK-së, Agim Veliu, ka treguar qëndrimet që Isa Mustafa i ka vënë në tavolinë të diskutimit me të parin e Vetëvendosjes.

Derisa Veliu thotë se LDK-ja i ka propozuar VV-së që të ndërrojnë rolet në rast se nuk pajtohen që t’ua japin atyre kryeparlamentarin, pesë ministri dhe presidentin, në VV thonë se dy palët ia kanë përmendur këto opsione më herët njëra-tjetrës.

Nënkryetarja e VV-së, Fatmire Kollçaku, ka thënë se në takimin e djeshëm, megjithatë ka pasur avancim në diskutim në mes të dy partive.

“Marrëveshja nuk është arritë, mirëpo ka pasur avancim në mes të dy partive. Gjithçka që mund të themi më shumë kanë deklaruar kryetarët e dy partive dje pas takimit”, thotë ajo.

Kollçaku tutje, ka thënë që të dy partitë janë për t’i çuar përpara negociatat që të finalizohet koalicioni VV – LDK.