Prokurorja sypatrembur nga Peja që zbardhi vrasjen 100 mijë frangëshe

Nëse dikush do të duhej të dekorohej apo ngritej në detyrë, nga institucioni i saj, atëherë padyshim që Prokurorja nga Peja Valbona Disha-Haxhosaj do ta meritonte. Guximi i kësaj gruaje, nën presionin e kërcënimeve me jetë të burrit dhe fëmijëve të saj, 5 vite pasi ndodhi një vrasje e porositur me 100 mijë franga zvicerane për t’u kryer, argumentoi deri në fund në Gjykatën Themelore të Pejës se 4 personat që ajo ndoqi për këtë rast janë kryerësit e krimit që u ekzekutua në pusi. Mirënjohje e avancime deri tash Kryeprokurori ka ndarë vetëm për prokurorët si Sylë Hoxha, Haxhi Dërguti e Imer Beka, që “të bëmat” e tyre të gjithë i njohim. E për diçka të tillë ende si ka ardhur rendi t’i jepet Valbonës, që zellin dhe guximin e saj për të luftuar krimin të paktën në dy raste të bujshme e ka dëshmuar.

Mijëra franga zvicerane u paguan për një vrasje dhe mijëra franga tjera u provuan t’i jepen ryshfet, përmes njerëzve autoritativë në Kosovë, një prokuroreje që ta mbyllë rastin. Por, Prokurorja e Prokurorisë Themelore të Pejës, Valbona Disha-Haxhosaj çoi deri në fund misionin e saj për të vënë para drejtësisë dhe për të dënuar grupin kriminal prej katër personash nga Gjakova dhe Deçani.

Për guximin e saj, përveç se iu ofruan para, e njëjta u kërcënua edhe me djegien e fëmijëve të saj dhe kidnapimin e bashkëshortit. Të gjitha këto u dëshmuan e u dëgjuan në gjykatë, shkruan Reporteri.net.

“Ata fillimisht duke planifikuar kidnapimin e bashkëshortit tim, e pastaj duke mos kursyer as më të shenjtit e secilit prind –fëmijët”, kishte pohuar prokurorja në një nga shqyrtimet gjyqësore.

E efekti i këtyre kërcënimeve ishte zero. Valbona Disha-Haxhosaj vazhdoi punën e saj, pa iu trembur syri.

“Por jo, e nderuara Gjykatë, në asnjë mënyrë nuk jam dorëzuar, e as nuk dorëzohem sepse këta ia kam borxh vendit tim, për ndërtimin e një shteti ku sundon ligji dhe vetëm ligji”, insistonte ajo.

Bekim Raja, 43 vjeçar, biznesmen nga Gjakova, me vendbanim në Zvicër, të enjten u dënua më 15 vite burgim për porositjen e vrasjes së Ferdinand Gjinit, në qershorin e vitit 2014.

Bashkë me Rajën u dënuan edhe vëllezërit Murat e Avni Sinanaj. I pari me 19 vite burgim për ekzekutimin e kësaj vrasje dhe 9 vite burgim Murati, si bashkëkryes i krimit me të vëllain.

Gjon Pnishi, i akuzuari i katërt në këtë rast, nga Gjykata Themelore e Pejës, u dënua me 6 vite burgim për pjesëmarrje në ekzekutimin në Deçan të 38 vjeçarit nga Gjakova, pesë vite më parë.

Ky dënim i zbutur ndaj Pnishit u shqiptua për shkak se i njëjti bashkëpunoi me prokurorinë për zbardhjen e këtij krimi të kryer në pritë.

Bashkëpunimi i Pnishit me Prokurorinë e Shtetit erdhi vetëm pak muaj pasi, Prokurorja Disha-Haxhosaj, qershorin e vitit 2016 arriti të argumentojë në Gjykatë se ai ishte i përfshirë në vrasjen e Ferdinand Gjinit. Pnishi, i vetëm, ishte dënuar më 18 vite burgim, por rasti u kthye në rigjykim, duke u shtuar në aktakuzë edhe tre personat tjerë, përfshirë edhe porositësin e vrasjes Bekim Rajën, pasi vendosi të tregojë gjithçka për shokët.

Vetëm pak muaj më pas Prokurorja Valbona Disha-Haxhosaj urdhëroi arrestimin e vëllezërve Murat e Avni Sinanaj, nga Deçani, dhe kërkoi ekstradimin e Rajës nga Zvicra, gjë që ndodhi në mars të vitit 2018. E në korrik të të njëjtit vit u ngrit aktakuza ndaj katër, tashmë, të dënuarve më gjithsej 49 vite burgim në total.

Motivi i vrasjes, sipas aktgjykimit të shpallur para një dite nga Gjykata e Pejës, ishte “hakmarrja e paskrupullt”.

Por kjo vrasje nuk është krimi i vetëm, që përkundër se u provua në çfarëdo forme të fshihej, e që Valbona Disha-Haxhosaj e zbardhi deri në fund.

E njëjta prokurore, nxori para drejtësisë edhe vrasësin e 24 vjeçares nga Deçani, Donjeta Pajazitajt nga kushëri i saj Naser Pajazjtaj, në nëntor të vitit 2015.

Madje, Pajazitaj fillimisht u shpall i pafajshëm nga trupi gjykues i Gjykatës Themelore të Pejës, vitin e shkuar, por insistimi i prokurores dhe ankesa e saj në Gjykatën e Apelit, ktheu në rigjykim rastin për t’u gjykuar nga një tjetër trup gjykues i Gjykatës Themelore të Pejës.

Një vit më vonë, Naser Pajazitaj u dënua me burgim të përjetshëm nga dëshmitë që solli në gjykatë prokurorja Disha-Haxhosaj.

Megjithatë, përkundër se u dëshmua për punën dhe guximin e saj për të vënë drejtësinë deri në fund, Valbona Disha-Haxhosaj vazhdon të mbetet një prokurore e thjeshtë në Pejë. Ajo asnjëherë nuk u ngrit në detyrë, madje as të paktën nuk u lëvdua ndonjëherë nga shefat e saj në Prokurori të Shtetit apo Këshill Prokurorial.

46 vjeçarja, e diplomuar në Juridik në vitin 2003, nga viti 2006 kur kreu Provimin e Judikaturës kishte filluar punën si bashkëpunëtore profesionale në, atë kohë, Prokurorinë Komunale të Pejës, derisa nga muaji gusht i 2011-ës kalon në Gjykatën e Qarkut në Pejë, në po të njëjtën pozitë.

Me 28 dhjetor 2012 nga Presidentja e vendit Atifete Jahjaga, Disha-Haxhosaj u dekretua si prokurore në Prokurorinë e Qarkut të Pejës, tash Prokuroria Themelore e Pejës, ku vazhdon të jetë e angazhuar edhe sot, shkruan Reporteri.net.

Kryeprokurori i Shteti Aleksandër Lumezi deri më sot mirënjohje ka dhënë vetëm për prokurorët si Imer Beka, ish-kryeprokurori i Prishtinës që ishte raportuar të jetë vënë në mbrojtje të politikanëve të dyshuar për korrupsion; Haxhi Dërgutin – po ashtu i afërt me politikanë më ndikim në vend, dhe i përmendur në aferën e njohur të përgjimeve ‘Pronto’.

Kryeprokurori i Shtetit mirënjohje ka patur edhe për Sylë Hoxhen, që dikur e kishte kundërshtar, që mbahet mend vetëm për përpjekjen e tij ta liruar nga burgu të vëllain e dënuar për korrupsion dhe shpalljen ‘vetëvrasje’ të rastit të Astrit Dehari, aktivistit politik të vdekur në qendrën e paraburgimit në Prizren, rrethanat e vdekjes së të cilit tashmë janë komplikuar edhe më shumë pas një raporti të ardhur nga Zvicra që ka rritur dyshimet se ka qenë vrasje.

Por, përveç mirënjohjes, Aleksandër Lumezi, Sylë Hoxhën edhe e ka avancuar duke e dërguar si Prokuror në Prokurorinë Speciale, pasi përfundoi mandatin si kryeprokurorë i Prizrenit.

Mirënjohje e avancim nuk pati asnjëherë për Valbona Disha-Haxhosajn, që për dallim prej tre të lartpërmendurve, të gjithë e kemi parë dhe kuptuar se do t’i kishte të merituara.

Për dallim nga tre të lartpërmendurit, që vazhdimisht kemi parë e dëgjuar se si shoqërohen me politikanë dhe njerëz tjerë me ndikim në vend, përgjimet e krimit ‘100 mijë frangash’ dëshmuan se Valbona Disha-Haxhosaj kishte refuzuar që ‘të pushtetshmit’ të ndikonin në punën e saj.

Megjithatë, ajo mbetet e pa avancuar./reporter.net/