Ambasadori amerikan ultimatum Albin Kurtit: Qeveria e re të formohet sa më shpejt

Ambasadori i Shteteve të Bashkuara të Amerikës në Kosovë, Philip Kosnett, ka bërë thirrje që Qeveria e re e Kosovës të formohet sa më shpejt që është e mundshme, transmeton Gazeta Metro.

Kosnett po thotë se Qeveria e re të formohet sa më shpejt që është e mundur dhe presin që partitë të sillen në mënyrë përgjegjëse dhe konstruktive.

“Sikurse të gjithë në Kosovë, ne presim certifikimin e rezultateve në ditët e ardhshme, dhe presim që qeveria e re të formohet sa më shpejtë që është e mundshme. Ambasada inkurajon diskutime të vazhdueshme lidhur me formimin e qeverisë para se të certifikohen rezultatet. Ne presim, ashtu siç e kërkon edhe Kushtetuta, që qeveria e Kosovës të shërbeje për të mirën publike për të gjithë qytetarët e saj të të gjitha komuniteteve. Presim nga të gjitha partitë, qoftë ato në qeveri apo në opozitë, që të sillen në mënyrë të përgjegjshme dhe konstruktive”, tha Kosnett për Telegrafin.

Kosnettt ka thënë se populli ka votuar për ndryshim duke votuar partitë që kërkuan zvogëlim të korrupsionit dhe zhvillim ekonomik.

“Është e qartë se populli i Kosovës votoi për ndryshim duke zgjedhur partitë përqendrimi i të cilave është në zvogëlimin e korrupsionit dhe rritjen e zhvillimit ekonomik. Edhe Shtetet e Bashkuara i përqafojnë këto synime” ka thënë Kosnett.

Kujtojmë se partia fituese Lëvizja Vetëvendosje nuk po arrin të bën një koalicion me Lidhjen Demokratike të Kosovës, kjo pasi nuk po munden që të bien dakord për ndarjen e ministrive, pozitës së Presidentit dhe pozitave të larta të tjera shtetërore.