A është e mundur: Kosova në grup me Zvicrën në EURO 2020?

19 nga 24 kombëtaret e mundshme tashmë kanë siguruar pjesëmarrjen në Euro 2020.

Sonte (e martë) do të mësohet edhe emri i kombëtares së 20-të, ndërsa në muajin mars do të kemi edhe katër kombëtare tjera që do t’u bashkohen këtyre, për të përmbushur listën prej 24 shteteve.

Në garë për një vend në Euro 2020 është edhe Kombëtarja e Kosovës, që synon të fitojë play offin e Ligës së D, duke kërkuar fillimisht fitoren kundër Maqedonisë së Veriut, e pastaj në finale kundër fituesit të duelit Gjeorgji – Bjellorusi.

Mediumi i njohur zviceran ‘Blick.ch’, i ka bërë një analizë situatës së shortit për Kampionatin Evropian, që do të mbahet në 12 vende.

Zvicra do të jetë në vazon e dytë në shortin që do të tërhiqet më 30 nëntor, i cili edhe mund të ketë ndryshime në pranverën e vitit të ardhshëm.

Sipas Blick, duke u ditur pozicionet në grupe që do të bëhen për vende që do të organizojnë ndeshje të Euro 2020 e po ashtu kundërshtarët që nuk kanë drejt loje mesvete, është shumë i mundur një grup mes Italisë, Zvicrës, Austrisë dhe Kosovës (nëse këta të fundit kualifikohen).

Një përballje kundër Zvicrës, do të ishte tejet emocionuese kur dihet se për helvetikët luajnë disa lojtarë nga Kosova, si Xherdan Shaqiri dhe Granit Xhaka.

Nuk bën harruar, se për të ndodhur kjo, Kosova fillimisht duhet të fitojë play offin.