Autobusët Podujevë-Prishtinë në grevë, udhëtarët në mëshirën e taksive ilegalë |PAMJE

Duke filluar prej sot Shoqata e Transportuesve të komunës së Podujevës kanë filluar të mbajë grevë.

Arsyeja e gjithë kësaj është prania e shumë taksive ilegalë në magjistralen Podujevë-Prishtinë.

Nga kjo shoqatë është kërkuar tash e sa kohë largimi i këtyre taksive ilegale, pasi që sipas tyre po e pengojnë procesin e punës.

Greva ka filluar që në orët e para të mëngjesit dhe do të vazhdojë derisa inspektorët komunalë të ndërmarrin masat e duhura për largimin e tyre.

Mirëpo ata që po humbin më së shumëti janë udhëtarët. Në stacionin e autobusëve shihen udhëtarë të cilët presin për transport publikë me orë të tëra. Ata që kanë fatin të gjejnë vende shkojnë me taksi ilegalë.

Ekipi i PodujevaPRESS-it ishte sot në teren ku mbretëron një kaos në transportin publikë. Gjatë magjistrales Podujevë – Prishtinë sheh udhëtarë që presin për autobusë. Ka shumë prej tyre të cilët as që ishin të informuar se sot ka filluar greva.

Ne biseduam me disa prej tyre, të cilët u shprehen të revoltuar pasi që disa kishin humbur ligjeratat në fakultet e shumë ishin vonuar për punë.

Deri më tani Shoqata e Transportuesve të komunës së Podujevës disa here ka hyrë në grevë. Nga komuna e Podujevës thonë se inspeksioni komunal vazhdimisht është në teren ku kanë shqiptuar shumë gjoba ndaj taksive illegal./PodujevaPRESS.com/