Dy zyrtarë të lartë në Komunën e Podujevës me akta.kuza nga Prokuroria e Shtetit |PAMJE

Komunës së Podujevës e cila udhëhiqet nga LDK-ja që nga paslufta me kryetar Agim Veliun, kohëve të fundit kanë filluar t’u shtohet numri i zyrtarëve komunal me aktakuza nga Prokuroria e shtetit, njofton portali PodujevaPRESS.com

Janë dy zyrtarët komunal Ahmet Ahmeti i cili deri më tani ka qenë menagjer i personelit në komunën e Podujevës dhe Avni Maloku ish-drejtor i Arsimit në këtë komunë, të cilët janë të akuzuar nga Prokuroria.

Prokuroria Themelore në Prishtinë ka ngritur aktakuzë me kërkesë për shqiptim të urdhrit ndëshkimor, ndaj ish-drejtorit të Drejtorisë së Arsimit në Komunën e Podujevës, Avni Maloku, ndërsa në shkurt të 2018-tës Prokuroria Themelore e Prishtinës ka ngritur aktakuzë ndaj shefit të personelit në Komunën e Podujevës, Ahmet Ahmeti për mosekzekutim të vendimeve gjyqësore. Zyrtarët e Prokurorisë kanë thënë se bëhet fjalë për një rast të mosekzekutimit të vendimit, por nuk kanë dhënë detaje më shumë.

Sipas aktakuzës së ngritur më 10 janar të këtij viti nga prokurorja Ajshe Ferati, ish-drejtori Maloku po akuzohet për veprën penale “cenim i të drejtave të punësimit dhe papunësisë nga neni 222 paragrafi 1 i Kodit Penal të Republikës së Kosovës, raporton “Betimi për Drejtësi”.

Maloku po akuzohet se më 15 shtator 2015, në Podujevë, ia kishte mohuar të drejtën në punësim në kushte të njëjta ashtu siç është përcaktuar me ligj të dëmtuarës Fatbardha Hoti, sipas një konkursi të shpallur në korrik të vitit 2015, nga Drejtoria e Arsimit në Komunën e Podujevës, për pranim të kuadrit arsimor për Shkollën Fillore të Mesme të Ulët, “Nuhi Gashi”, në fshatin Bradash, për mësimdhënës të historisë.

Një gjë të tillë sipas prokurorisë, Maloku e kishte bërë edhe pse e dëmtuara i kishte plotësuar të gjitha kushtet ligjore të parapara me udhëzimin administrativ të Ministrisë së Arsimit, Shkencës dhe Teknologjisë (MASHT), numër 06/2016,  për normativin mbi kuadrin profesional të arsimit të përgjithshëm.

Sipas aktakuzës, për shkak të shkeljeve të evidentuara në këtë konkurs, inspektorati i arsimit në MASHT, kishte kërkuar që i njëjti të rishqyrtohej, por një gjë e tillë nuk ishte zbatuar nga ana e drejtorisë që udhëhiqte i akuzuari.

“Inspektori i arsimit i DKA-së për shkak të shkeljeve ligjore në përzgjedhjen e kandidatit i ka rekomanduar kësaj drejtorie që në afat prej 8 ditësh ta rishqyrtoj konkursin për vendin e punës për mësimdhënës për lëndën e historisë, mirëpo edhe përkundër kësaj, të njëjtës ia ka mohuar të drejtën për punësim, duke i shkaktuar dëm material në vlerë të papërcaktuar”, thuhet në aktakuzën e ngritur ndaj Malokut.

Ndryshe, ish-drejtori Maloku, në mbrojtjen e tij të dhënë në prokurori kishte mohuar kryerjen e veprës penale duke thënë se komisioni i ngarkuar në përbërje prej tre anëtarëve kishte vendos që të pranohet kandidati Mirsad Rashiti në atë pozitë për arsye, se ka plotësuar kushtet për atë konkurs.

Po ashtu, Maloku në mbrojtjen e tij kishte theksuar se nuk ka qenë në dijeni për rekomandimet e inspektoratit për rishqyrtim të konkursit për vendin e punës.

Ndërsa në shkurt të 2018-tës Prokuroria Themelore e Prishtinës ka ngritur aktakuzë ndaj shefit të personelit në Komunën e Podujevës, Ahmet Ahmeti për mosekzekutim të vendimeve gjyqësore. Zyrtarët e Prokurorisë kanë thënë se bëhet fjalë për një rast të mosekzekutimit të vendimit, por nuk kanë dhënë detaje më shumë. Zëdhënësi i Prokurorisë Speciale, Ekrem Lutfiu, ka thënë se në këtë aktakuzë nuk ta përfshirë të tjerë, pos Ahmet Ahmetit.

“Prokuroria Themelore në Prishtinë ka ngritur aktakuzë më 08.01.2018, kundër të akuzuarit Ahmet Ahmeti, për vepër penale ‘mosekzekutimi i vendimeve gjyqësore’ nga neni 402, paragrafi 1 i KPRK-së. Bëhet fjalë vetëm për një rast. Kallëzimi penal është ushtruar vetëm kundër të akuzuarit, dhe bazuar në prova, është ushtruar aktakuzë vetëm kundër të akuzuarit në fjalë”, ka thënë Ekrem Lutfiu, shkruan sot Koha Ditore.

Në nenin 402, pika 1 të Kodit Penal të Republikës së Kosovës që flet për mosekzekutimin e vendimeve gjyqësore thuhet se personi zyrtar apo përgjegjës i cili refuzon të ekzekutojë urdhrin, vendimin apo aktgjykimin e plotfuqishëm të ndonjë gjykate të Republikës së Kosovës po i cili nuk e ekzekuton vendimin brenda afatit ligjor apo afatit të caktuar me vendim, dënohet me gjobë ose me burgim deri në dy vjet.