Ministri Fatmir Matoshi viziton Orllanin, ku dha disa premtime për banorët

Ministri i Mjedisit dhe Planifikimit Hapësinor, Fatmir Matoshi, sot ka marrë pjesë në shënimin e 22 Marsit, Ditës Ndërkombëtare të Ujit dhe 23 marsit- Ditës Ndërkombëtare të Meteorologjisë e organizuar në Liqenin e Batllavës.

Ai tha se Ministria e Mjedisit dhe Planifikimit Hapësinor është e përkushtuar dhe e interesuar që të mbështes zhvillimin e Orllanit ndërsa tregoi që këtë vit banorët e kësaj pjese do të bëhen me ujë të pijshëm fal një projekti që është duke realizuar MMPH-ja.

“ Siç e dini, këtë vit fillojmë një investim milionësh për ujësjellësin e fshatit Orlllan sepse është një padrejtësi e madhe që gjithë banorët e kësaj zone të shohin ujin që ne e përdorim çdo ditë në Prishtinë ndërsa në shtëpitë e tyre të mos kenë ujë dhe ujësjellës. Prandaj kësaj padrejtësie po i japim fund përgjatë këtij viti dhe do të vazhdojmë edhe në zona tjera që të mbështesim banorët, lokalitetet të cilat përveç që jetojnë këtu kanë një rëndësi të veçantë edhe për mbarëvajtjen e jetës në tërë territorin e Republikës së Kosovës”, tha Matoshi, transmeton Klan Kosova.