Çfarë ndodhi me nënkryetarin e Komunës së Podujevës

Dje rreth orës 12:00 në rrugën “Zahir Pajaziti” është sulmuar fizikisht nënkryetari i Komunës së Podujevës, Nexhmi Rudari.

Burimet bëjnë të ditura se ish-drejtori i Qendrës për Punë Sociale në Podujevë, Osman Jashari dyshohet se e ka sulmuar fizikisht nënkryetarin Rudari.

Jo zyrtarisht mësohet se kacafytja ka ndodhur për shkak të një mos-punësimi të një të afërmi të Osman Jasharit.

Pas sulmit, mësohet se ishte nënkryetari i Podujevës, Nexhmi Rudari ai i cili edhe nuk ka dashur të hapë rast për gjithë këtë, shkruan Llapi.info. Ndërsa, në Stacionin e Policisë në Podujevë thonë se e kanë marrë një informatë anonime për një zënkë në rrugën “Zahir Pajaziti”.

“Në Stacionin e Policisë në Podujevë është ardhur një informatë anonime për një zënkë në rrugën “Zahir Pajaziti”, Policia ka dalë por të njëjtit s’kanë parë askënd në vend ngjarje”, ka thënë zëdhënësja për informim në Policinë e Podujevës, Antigona Çitaku.

Mirëpo më vonë nënkryetari i Komunës së Podujevës, Nexhmi Rudari ka mohuar kategorikisht lajmin se është sulmuar sot gjatë ditës nga Osman Jashari ish- drejtor për punë sociale.

Ai ka thënë se me personin në fjalim për të cilin thuhet se e ka sulmuar nuk ka kurrfarë raporte.

“Jo nuk është aspak e vërtetë, nuk më ka sulmuar askush. Me atë person nuk kam kurrfarë raporte as të mira as të këqija. Nuk e di pse dhe nga ky lajm”, ka thënë ai shkurt në një bisedë për Indeksonline.

Indeksonline ka provuar të kontaktojë edhe me Jasharin, mirëpo kontakti me të ka qenë i pamundur.

Megjithatë, disa medie raportuan se përleshja ka ndidhur për shkak të një mospunësimi të një të afërmi të Osman Jasharit.