Ambasadori Britanisë, O’Connell: Nëse nuk arrihet marrëveshja me Serbinë, Kosovën e presin pasoja

Ambasadori i Mbretërisë së Bashkuar në Kosovë, Ruairi O’Connell ka deklaruar se nëse Kosova nuk arrinë marrëveshje me Serbinë në Bruksel, do të ketë probleme të reja, transmeton Gazeta Metro.

O’Connell ka thënë se liderët e Kosovës duhet që të kenë besim tek aleatët ndërkombëtarë që bisedimet me Serbinë të nisin sa më shpejt dhe të arrihet marrëveshja finale mes dy vendeve.

Ambasadori britanik ka thënë se Kosovën do ta presin pasoja të reja nëse nuk arrihet marrëveshje me Serbinë në Bruksel gjatë këtij viti, pasi të gjitha vendet e fuqishme po e përkrahin që kjo çështje të marrë fund.

“Nëse nuk arrihet marrëveshja me Serbinë, Kosova do të ketë probleme të reja”, tha O’Connell.

O’Connell tha se Kosova pret nga ndërkombëtarët shtrimin e parimeve në këtë proces, por sipas tij Kosova është ajo që duhet të propozojë vet qëndrimet për dialog.

“Kam parë mungesë të transparencës. Ne jemi të shqetësuar që është përmendur vazhdimisht ideja e ndryshimit të kufijve. Kjo është logjikë e të kaluarës që shtetet duhet të jenë pak a shumë etnikisht të pastra. Kjo nuk mund të jetë në përputhje me qasjen që kemi pasur deri më tash. Kjo është destabilizuese”, tha O’Connell në T7./gazetametro.net