I akuzuari mohon t’i ketë ndihmuar djalit të tij të fsheh parat dhe pajisje të përvetësuara nga banka në Podujevë

Xhemajl Maliqi, i cili akuzohet për fshehje të provave, parave dhe pajisjeve të kamerave, ka mohuar t’i ketë ndihmuar djalit të tij të fsheh paratë e disa pajisje, që ky i fundit e kishte pranuar fajësinë se i kishte marr në Bankën Kombëtare Tregtare (BKT).

“Nuk është e vërtetë dhe betohem se as si kam ndihmu dhe as si kam mshef, as një mjet i asaj  banke nuk ka hi në shpi tem”, ka deklaruar ai.

Këtë deklaratë, ai e ka dhënë në seancën e së enjtes ku bashkë me të edhe djali i tij, Bujar Maliqi, akuzohet se i kishte përvetësuar në cilësinë e zyrtarit të Bankës Kombëtare Tregtare (BKT).

Në këtë rast, i akuzuari Bujar Maliqi, më 10 maj të vitit 2018, kishte pranuar fajësinë për keqpërdorim të pozitës zyrtare, andaj gjykimi po vazhdon vetëm ndaj babait të tij, Xhemajl Maliqi, raporton “Betimi për Drejtësi”.

Ai duke u përgjigjur në pyetjet e avokatit të tij Sevdali Zejnullahu, ka deklaruar se ka punuar në cilësi të rojës në fabrikën e vajti, në fshatin Lluga të Podujevës.

I akuzuari Maliqi, ka thënë se është në njohuri për çka po akuzohet dhe se nuk ka asgjë për të thënë pasi që nuk di asgjë.

“Sot e kësaj dite nuk e di se çfarë është bërë”, ka thënë ai gjatë seancës.

Ai ka deklaruar se kishte qenë për të vizituar djalin e tij në paraburgim dhe se gjendja shëndetësore e këtij të fundit kishte qenë shumë e rënduar.Sipas tij, ata kanë zhvilluar biseda dhe ka pasur zhurma të mëdha pasi ka pasur edhe persona të tjerë që i kanë vizituar të afërmit e tyre që gjendeshin në paraburgim.

Kryetari i trupit gjykues, Arben Hoti, ka pyetur të pandehurin për dijeninë e tij se gjatë kësaj bisede ka qenë i përgjuar, ku përgjimi ka qenë ligjor që është bërë me urdhëresë të gjykatës, e përgjigja e të akuzuarit ka qenë “ Jo”.

Gjykatësi Hoti, e ka pyetur se për çka e ka pasur fjalën i akuzuari tjetër Bujar Maliqi, kur në një pjesë të bisedës thotë “280 euro nëse t’i jep mirë është, mi marr i qon në Intereminex”.

“E ka pas fjalën për mi gjet ato pare te dajt e Bujarit, për mi kompensu dëmin që e ka bërë në bankë. Ka qenë për mi gjet paratë për me kompensu dëmin e shkaktuar në bankë dhe paratë mi marr nga dajt e Bujarit”, është përgjigjur i pandehuri.

“Në një moment të caktuar Bujari thotë 280 euro janë të tjerat janë 20.000 në dollar e franga”, ka vazhduar duke pyetur gjykatësi Hoti.

Kurse, i akuzuari ka thënë se nuk është në dijeni se djali i tij i ka thënë këto fjalë.

“Në një moment të bisedës a të kujtohet që të ka thënë djali “po qysh jo, kanë me ardh 100 herë, mos i maj armët… që i kena lon jashtë me hi nëpër temel kanë me shti kanalizim që e kena qit përmas… 100.000. meqë e gjejn vallahi edhe është gjys thesi pare aty”, ishte pyetja tjetër e gjykatësit Hoti.

Kurse, dëshmitari sërish ka thënë se nuk i kujtohet një gjë e tillë.

Ai ka shtuar se është fakt se ka qenë në vizitë te djali i tij dhe para se të arrinte në shtëpi kanë shkuar policia dhe kanë kontrolluar shtëpinë, e sipas tij nuk kanë gjetur asgjë dhe se nuk ka asgjë të vërtetë nga ato fjalë apo incizime.

Për të akuzuarin pyetje nuk kanë pasur as prokurorja Ferdane Sylejmani, e as përfaqësuesi i palës së dëmtuar, Ardit Ramadani.

Gjatë kësaj seance, gjykata ka bërë të ditur se është pranuar ekspertiza e përgjimeve nga ana e Agjencisë Kosovare për Forenzikë .

Për këtë ekspertizë ka pasur vërejtje avokati i Xhemajl Maliqit, Sevdali Zejnullahu, lidhur me pjesën e transkriptit ku pas fjalisë, apo në mes të fjalive sipas tij, ka pika. Sipas tij, për mbrojtjen është e paqartë se çfarë nënkuptojnë.

Lidhur me këtë akuzë, më 10 maj të vitit 2018, Bujar Maliqi e kishte pranuar fajësinë.

Në këtë rast, akuzohet edhe babai i tij, Xhemajl Maliqi, mirëpo ai ishte deklaruar i pafajshëm për fshehje të provave, parave dhe pajisjeve të kamerave, të cilat i pandehuri Bujar Maliqi, akuzohet se i kishte përvetësuar.

Prokurorja Sylejmani për të akuzuarin Bujar Maliqi, e kishte bërë precizimin e aktakuzës, duke hequr veprën penale “vjedhje e rëndë”, dhe duke akuzuar të njëjtin vetëm për “keqpërdorim të pozitës apo autoritetit zyrtar”.

Pas këtij ricilësimi që ishte bërë dhe pas konsultimit me mbrojtësin e tij, avokatin Besnik Berisha, i akuzuari Bujar Maliqi kishte pranuar fajësinë për keqpërdorim detyre.

Sipas aktakuzës së ndryshuar, Bujar Maliqi akuzohet se më 10 janar 2014, në cilësinë e personit zyrtar në bankën BKT, kishte keqpërdorur pozitën zyrtare, me qëllim që t’i sjell vetit dobi pasurore, kishte përvetësuar para në vlerë prej 284,995.70 euro, 13,827 dollarë, 12,180 franga zvicerane dhe 5,510 funte britanike.

Ndërsa, Xhemajl Maliqi, akuzohet për fshehje të provave, parave dhe pajisjeve të kamerave, të cilat i pandehuri Bujar Maliqi, akuzohet se i kishte përvetësuar./BETIMIPËRDREJTËSI/