Gjykata Speciale pranon aplikime për mbi 30 vende të lira pune, deri më 25 janar

Dhomat e Specializuara të Kosovës dhe Zyra e Prokurorit të Specializuar, që njihet me emrin Gjykata Speciale, ka shpallur prej kohësh konkurs për mbi 30 vende të lira pune.

Sipas një njoftimi të Dhomave të Specializuara të Kosovës, të publikuar në uebfaqen zyrtare të saj, të interesuarit mund të aplikojnë deri më datë 25 janar, kur pritet të mbyllet afati i konkursit, shkruan Insajderi.

Gjykata Speciale është gati të punësojë mbi 30 persona si përkthyes, revizor, asistent të financave apo asistent administrativ etj.

Megjithatë, në këto vende pune do të pranohen vetëm shtetasit e vendeve anëtare të Bashkimit Evropian apo të shteteve të tjera kontribuese në Gjykatë si Kandaja, Norvegjia, Zvicra, Turqia dhe Shtetet e Bashkuara të Amerikës.

“Nё Dhomat e Specializuara dhe Zyrën e Prokurorit tё Specializuar mund tё punësohen VETËM shtetas tё shteteve anëtare tё BE-sё dhe tё shteteve tё treta kontribuese (Kanada, Norvegji, Zvicër, Turqi dhe Shtetet e Bashkuara tё Amerikës). Kandidatët që i plotësojnë kushtet inkurajohen që të aplikojnë për vendet e lira të punës në këtë Ftesë për Aplikime duke përdorur formularin E RI të aplikimit që gjendet në rubrikën ‘Punësimi’”, thuhet në njoftimin e Gjykatës Speciale.