Korrupsioni ia humb Kosovës milionat e premtuara nga Amerika

Kosova ka humbur miliona euro investime në formë të grantit nga agjensia qeveritare amerikane Korporata Sfidat e Mijëvjeçarit (MCC).

Bordi i kësaj agjencie ka vendosur që ta ulë në Kosovën për një kategori më poshtë, përkatësisht nga programi “Compact” në atë “MCC threshold”. Ky vendim i bordit të MCC ka ardhur pas dështimit të Kosovës për t’u përballur me fenomenin e korrupsionit, shkruan Gazeta Blic.

Derisa në vitin 2016, Kosova ishte vlerësuar se ka shënuar progres në luftimin e korrupsionit, për vitin 2017 është shënuar regres në këtë fushë. Kjo i ka kushtuar Kosovës me degradim në program të Korporata Sfidat e Mijëvjeçarit (MCC).

“Bordi përzgjodhi Kosovën dhe Timorin Lindor për t’i zhvilluar programet hyrëse të MCC-së dhe ri-përzgjodhi Togon për të vazhduar në zhvillimin e programit të vetë hyrës”, thuhet në njoftimin e Korporatës Sfidat e Mijëvjecarit (MCC). “Programi i pragut më të vogël (Threshold) i jep MCC-së mundësinë që të punojë me vendet në mënyrë specifike në reformat politike dhe institucionale”.

Në një dokument të publikuar në ueb-faqen e MCC janë shpjeguar përfitimet dhe dallimet në mes të programit “Compact” dhe “Threshold”. Kosova ka qenë vetëm vendi i tretë në Europë i selektuar në programin Kompakt. Ky program është pesëvjeçar me një mundësi të madhe për investime të cilat shkojnë për disa sektorë ekonomikë të një vendi me qëllim të krijimit të vendeve të reja të punës, uljes së varfërisë dhe luftën kundër korrupsionit. “MCC Threshold” përshkruhet si program afat-shkurt që kryesisht janë fonde shumë më të kufizuara që shkojnë në sektorë të ndryshëm të një shteti me qëllim të përgatitjes së tij për t’u bërë kandidatë për programin “Compact”. /PodujevaPress/