PODUEVË: Pas raportimeve të mediave, përjashtohet menaxheri i Viva Fresh Store dhe anulohet vendimi i tij për pushimin e punëtorëve

Pas raportimeve të Periskopit për anulimin e kompensimit të ditëve të pushimit për puëntorët e rrjetit të marketeve “Viva Fresh Store”, dje ka qenë një ditë plot zhvillime dramatike në pikën e këtij rrjeti në Komunën e Podujevës.

Periskopi ka mësuar se pas raportimeve të mediumit tonë, menaxherë kryesor të “Viva Fresh Store” gjatë ditës së djeshme kanë marrë vendimin për përjashtimin e menaxherit E.ZH nga pika në Podujevë.

Mësohet se ai është zhvendosur në një pikë tjetër.

Po ashtu, është anuluar vendim i tij për mohimin e të drejtës së kompensimit të ditëve të pushimit që iu ishin anuluar punëtorëve që nga 19 dhjetori.

Një vonesë në punë, qoftë edhe për dy minuta – atyre u kishte kushtuar me heqje kompensimi të një dite pushimi, ndonëse në atë ditë kishin punuar deri në 15 orë gjatë fundvitit, gjatë tërë ditës, e madje nganjëherë edhe natën.

Të dielën, Periskopi raportoi se si menaxheri i pikës së “Viva Fresh Store” në Podujevë, më 5 janar kishte publikuar një raport për hyrjet dhe daljet e punëtorëve, të regjistruar në sistem nga data 1 janar 2019.

Të gjithë ata që ishin vonuar qoftë edhe një ose dy minuta do të ndëshkoheshin, pavarësisht angazhimit të tyre maksimal në fundvit.

Dy minuta vonesë në punë, menaxherë të kësaj pike i barazuan me një ditë punë prej 12 orësh.

Punëtorë të këtij rrjeti të marketeve e kishin për obligim që të jenë në vendin e tyre të punës, të paktën 15 minuta më herët.

Nëse puna e tyre fillonte në 08:00, ata duhej të regjistronin hyrjen në sistem në 07:45.

E të gjithë ata që u vonuan, qoftë për disa minuta, u ndëshkuan.

Në fotografinë e siguruar nga Periskopi shihej se si në listën e punëtorëve, atyre u janë hequr një ditë, ose dy ditë kompensim për punët shtesë gjatë fundvitit.

Punë deri në 12 orë, pa pauzë, pa asnjë ditë pushim dhe pa asnjë cent kompensim për orët shtesë ishin vetëm disa prej shkeljeve flagrante të të drejtave të punëtorëve nga rrjeti i madh i marketeve “Viva Fresh Store” për të cilat kishte raportuar Periskopi në prag të festave të fundvitit.

Me t’u publikuar një seri artikujsh nga Periskopi në të cilët trajtoheshin shkeljet e të drejtave të punëtorëve, në adresën tonë kishin mbërritur një seri shkrimesh akuzuese nga punëtorë e konsumatorë të këtij rrjeti të marketeve, nga të gjitha pikat që shtrihen gjithandej Kosovës.

Skandaloz është fakti se si inspektorët e punës vazhdojnë të heshtin përballë këtyre padrejtësive, ndonëse ato janë dokumentuar nga mediet disa herë./PERISKOPI