LDK vazhdon të kërkojë që vendi të shkojë në zgjedhje

Lidhja Demokratike e Kosovës po vazhdon të insistojë që vendi të shkojë në zgjedhje. Sot, kjo parti përsëri ka përsëritur qëndrimin e saj për zgjedhje të reja në vend, transmeton Gazeta Metro.

LDK e ka përsëritur këtë qëndrim sot, nëpërmjet zëdhënësit të saj, Besian Mustafa. Në një konferencë për media, ai ka thënë se ky koalicion qeverisës është në panik dhe këtë e kanë kuptuar qytetarët, duke shtuar se nga paniku, sipas tij, kanë nisur fushatë kundër LDK’së.

“E ashtuquajtura qeveria e madhe, e vendimeve të mëdha po e shëtit përgjegjësinë e bisedimeve nga kryeministri, tek presidenti e tash tek një grup negociator. Kjo qeveri është në panik dhe tashmë e kanë kuptuar edhe qytetarët. Ky koalicion qeverisës ka Qeverinë, Kuvendin dhe Presidentin, pra të gjitha institucionet. Nga paniku kanë nisur një fushatë ndaj LDK-së. Përgjegjësinë për ta udhëhequr shtetin e ka Qeveria dhe jo opozita”, tha ai.

Tutje, ai ka thënë se kjo qeveri i ka mashtruar qytetarët për liberalizim të vizave, për demarkacion dhe se e ka humbur besimin te qytetarët.

“Kanë dështuar në liberalizim, në Interpol, në krijimin e vendeve të punës. E kanë humbur besimin e qytetarëve. U ka dalë nga kontrolli veriu i Kosovës. I kanë mashtruar qytetarët e Kosovës për demarkacionin me Malin e Zi. Kanë humbur njohje, kanë falimentuar kompani publike. LDK ka qenë dhe është gjithmonë për dialog me shtetet fqinje, por me kufijtë që i ka shpallur më 17 shkurt. LDK është për një dialog ku Serbia e njeh Kosovën”, u shpreh ai.

Mustafa gjithashtu ka thënë se LDK parapëlqen të hyjë në zgjedhje vetëm.