Opozita akuzon Komunën e Podujevës për dekorim qyteti me “mustaqet” e vjetme

“Mustaqe” të vjetra i kanë quajtur dekorimet e qytetit të Podujevës opozita e kësaj komune. Për të njëjtat dekorime, sipas tyre, komunarët kanë paguar të njëjtën kompani më shtrenjtë se vitin e kaluar. Shefi i Grupit të këshilltarëve të LVV-së në këtë komunë, Fitim Haziri, dyshon edhe në kurdisje të tenderit nga ana e kryetarit Agim Veliu, pasi thotë se kompania fituese i ka shfrytëzuar dekorimet që i kishte përdorur edhe në fund të vitit 2017.

“…Edhe qyteti jonë ashtu si i pari i komunës është krejt ndryshe nga qytetet e tjera, sepse feston me të njëjtat mustaqe edhe ketë fundvit. Ndoshta tani me mustaqe pakë më të rritura. Mustaqe që kanë kushtuar 9.945 euro për dallim nga viti paraprak kur të njëjtat mustaqe kanë kushtuar 7.600 euro nga i njëjti klient i cili është i pari i komunës dhe i njëjti “berber” e që e ka emrin ‘Anea”, ka shkruar në një reagim, Fitim Haziri. “Qytetarë të nderuar të Llapit, bëhet fjalë për dekorimin e qytetit të Podujevës për festat e fundvitit, dekorim i cili është bërë me dizajn të njëjtë e me çmim të ndryshëm nga viti paraprak nga e njëjta kompani. Këtu ka vend për dyshim në marrëveshje dhe kurdisje të tenderit në mes të kryetarit të komunës dhe kompanisë ‘Anea’.

Edhe shefi i Grupit të këshilltarëve të PDK-së, Rafet Llapashtica, ka thënë se dekorimi që është përdorur sivjet është i ngjashëm me atë nga viti i kaluar.

Kjo qeverisje nuk ka bërë asnjë konsultë as me bizneset që gravitojnë në rrugën kryesore përgjatë sheshit, ku shumë besoj se secila kishte me dekorua pjesën e vet ku e rrok hapësira e biznesit, qofshin ato bankat komerciale apo bizneset tjera në mënyrë që të mos shpenzohet kjo shumë e panevojshme e mjeteve dhe të kemi një pamje kaq jo atraktive dhe të njëjtë çdo vit.

Me mjetet e kursyera, sipas Llapashticës do të duhej të ndihmohej ndonjë familje në nevojë në këtë kohë dimri, ose të dërgohen dhurata në familjet me nevoja të rënda për festën e Vitit të Ri.

Ndërkohë, zyrtarët komunalë kanë qenë shumë të rezervuar në përgjigjet për çështjet e ngritura nga zyrtarët opozitarë. Të vetmen gjë që e kanë thënë është çmimi i kontratës dhe emri i kompanisë.

Në anën tjetër, zyrtarë e kompanisë “Anea” fillimisht kanë thënë se tenderi për dekorimin e qytetit të Podujevës është zhvilluar sipas të gjitha rregullave të parapara të prokurimit publik. Në përgjigjet me shkrim të kësaj kompanie është mohuar se dekorimi nuk është i njëjtë me vitin e kaluar dhe se dhe dritat e vendosura janë të reja dhe është bërë dekorim shtesë i parkut të qytetit.

Megjithatë, ata e kanë pranuar se “mustaqet” janë të ngjashme me ato të vitit të kaluar.

Zyrtarët e “Aneas” kanë folur edhe për simbolizimin e këtyre ‘mustaqeve’. Kanë thënë se janë figura abstrakte dhe se ato, sipas tyre, përdoren në shumë qytete të botës. (Artikullin e plotë mund ta lexoni në numrin e sotëm të Kohës Ditore)