E konfirmon ministri: Kufiri Kosovë-Shqipëri do të ndryshojë

Ministri i Brendshëm i shtetit shqiptar, Sahndër Lleshaj ka bërë të ditur se shumë shpejt priten ndryshime të mëdha në kufirin mes Kosovës dhe Shqipërisë.

Lleshaj ka thënë se së shpejti do të hiqen kontrollet e dyfishta, si dhe ka shtuar se policitë e të dyja vendeve do të kryejnë kontrolle të përbashkëta.

“Ndryshime të rëndësishme në menaxhimin e kufirit me Kosovën. Kontrollet e dyfishta hiqen. Policitë e të dy vendeve do të kryejnë së bashku kontrollet sipas parimit një ndalesë një kontroll”, ka thënë ai.

Në Twitter, Lleshaj ka potencuar se ky vendim i Qeverisë shqiptare erdhi dje, dhe ai beson se do të ndikojë në lëvizjen e lirë.

“Qeveria miratoi dje vendimin për këtë ndryshim të rëndësishëm, që lehtëson ndjeshëm lëvizjen e lirë ndërmjet Shqipërisë dhe Kosovës”, ka shtuar ai.

Mirëpo, për Lleshajn, ky nuk do të jetë ndryshimi i fundit. Ai thotë se së shpejti priten vendime të reja dhe hapa të rëndësishëm për të vendosur standarde evropiane në kufirin mes dy vendeve.

Sidoqoftë, këto hapa po vijnë pas mbledhjes së fundit të dy qeverive, ku dy kryeministrat u zotuan që të largohen barrierat kufitare./gazetametro.net