PODUJEVË: Dënohen me kusht gjashtë të akuzuarit për manipulim me vota

Gjykata Themelore në Prishtinë, pas mbajtjes së shqyrtimit të dytë, ka shpallur fajtorë gjashtë të akuzuarit për mashtrim me votime, Blerim Emini, Ejup Emini, Sami Azemi, Arsim Nazifi, Milazim Berisha dhe Shkëlzen Jaha.

Për mashtrim me votime në zgjedhjet e vitit 2010, të akuzuarit, secili veç e veç, janë dënuar me nga tre muaj burgim, i cili nuk do të ekzekutohet nëse brenda periudhës verifikuese prej një viti nuk kryejnë vepër tjetër penale.

Ndërsa, për të akuzuarën e shtatë, Dafina Shabani, u refuzua akuza, meqë paraprakisht, në seancën e së hënës, prokuroria u tërhoq nga akuza, raporton “Betimi për Drejtësi”.

Të akuzuarit Blerim Emini, Ejup Emini, Sami Azemi, Arsim Nazifi, Milazim Berisha dhe Shkëlzen Jaha, gjatë shqyrtimit t dytë, të mbajtur të hënën, kërkuan të deklarohen edhe një herë rreth fajësisë, meqë në shqyrtimin fillestar ishin deklaruar të pafajshëm.

Secili, veç e veç, në seancën e së hënës, deklaroi se e pranon fajësinë lidhur me veprën penale e cila i vihet barrë.

“Pranimi i fajësisë është në përputhje me provat e paraqitura në aktakuzë dhe ky pranim është dhënë me vullnet të lirë dhe pa presion, andaj i propozoj gjykatës që ta aprovojë këtë pranim të fajësisë dhe të njëjtit t’i shpallë fajtor”, deklaroi prokurori Armend Hamiti.

Ndërsa, sa i përket të akuzuarës Dafina Shabani, mbrojtësi i saj, avokati Naim Rudari tha se qëndrojnë në tërësi pranë parashtresës së dorëzuar me shkrim kësaj gjykate, sipas së cilës kanë kundërshtuar provat dhe kanë kërkuar hudhjen e aktakuzës.

“Aktakuza e cila është ngritur dhe është objekt shqyrtimi nuk përmban asnjë provë lidhur me Dafina Shabanin dhe veprën penale për të cilën akuzohet. Me provat e paraqitura në aktakuzë, nuk vërtetohet fare se Dafina ka qenë në të njëjtin vendvotim, madje ne kemi prova që dëshmojnë se ka qenë krejt diku tjetër. Kemi deklaratën e dhënë në polici, ku shihet se 7 rreshtat e parë në këtë deklaratë janë shabllon nga deklaratat e tjera, ndërsa deklarata e Dafinës rrjedh nga rreshti i tetë, ku shihet se ajo ka qenë në një shkollë krejt tjetër”, deklaroi avokati Rudari.

Ndër të tjera, ai tha se në provat e prokurorisë, mungon emri i Dafina Shabanit në librin e vendvotimit për të cilin e njëjta akuzohet.

Andaj, avokati Rudari, i propozoi gjykatës që të mos shkohet më tutje në procedurë sa i përket të mbrojturës së tij, sepse, sipas tij, nuk ekziston dyshimi i arsyeshëm se ajo e ka kryer këtë vepër.

“Sa i përket kundërshtimit, pas shikimit të deklaratës së dhënë nga e akuzuara në polici, shihet qartë se edhe deklaratën kur e ka dhënë i është referu shkollës fillore Naim Frashëri në Podujevë e jo shkollës për të cilën shkruhet në aktakuzë. Po ashtu, edhe nga provat e tjera materiale që janë propozu me këtë aktakuzë shihet se emri i saj nuk figuron në listën ku janë të tjerët dhe s’ka nënshkrim të saj”, deklaroi prokurori Hamiti, me rastin e heqjes dorë nga akuza.

Ndryshe, në bazë të aktakuzës së 1 prillit 2015, prokuroria pretendon se më 12 dhjetor të vitit 2010, në fshatin Lluzhan të Komunës së Podujevës, të akuzuarit në cilësinë e anëtarëve të Komisionit Qendror të Zgjedhjeve, të partive të ndryshme politike, në bashkëveprim me njëri tjetrin kanë manipuluar rezultatet e zgjedhjeve.

Sipas prokurorisë, të akuzuarit kanë manipuluar 534 vota të partive të ndryshme dhe për këtë shkak procesi i votimit është dashur të përsëritet.

Me këto veprime, sipas aktakuzës, kanë kryer veprën penale “mashtrim me votime”, nga neni 180, lidhur me nenin 31, të KPK – së./BetimipërDrejtësi/