Funksionalizimi i plotë i Spitalit të Podujevës ishte premtuar për vitin e kaluar, por s’u bë ende

Ndërtimi i objektit të Spitalit të Ri në Podujevë ka vite që është finalizuar, ndërsa funksionalizmi i tij vazhdon të shtyhet.

Ishte premtuar që në vitin 2017 spitali të jetë tërësisht funksional, por, deri tash, në këtë objekt është bartur vetëm Reparti i Maternitetit, raporton KTV.

Opozita këtë projekt e ka quajtur pjesë të fushatës elektorale. Sipas opozitës, mosfunksionalizimi i Spitalit të Ri të Përgjithshëm është dështim i qeverisjes lokale aktuale në Podujevë.

Por, për këtë zvarritje, Komuna e Podujevës e ka fajësuar Ministrinë e Shëndetësisë.

“Në vitin 2016, Ministria e Shëndetësisë mori vendim për themelimin e Spitalit të Përgjithshëm në Podujevë dhe përcaktoi afatet kohore për funksionalizmin e tij. Këto afate nuk janë respektuar dhe, për pasojë, spitali ende nuk është funksional”, ka thënë Nazmi Elezi, shef i Zyrës për Informim në Komunën e Podujevës.

Derisa komuna e Podujevës thotë i ka kryer të gjitha punët që i takojnë, Ministria e Shëndetësisë nuk iu është përgjigjur pyetjeve të KTV-së.

Në objektin e ri të spitalit janë vendosur edhe mjete të reja mjekësore, ndërsa në qendrën funksionale ka mungesë.