Ja si u zbuluan nga Dogana se cigaret e destinuara për KFOR-in, në Sfeqël të Podujevës u ndërrohej destinacioni

Në gjykimin për krim të organizuar, ku të akuzuar janë Shaip Ferizi, Shqipe Avdiu, Arben Jashari, Mustafë Vitia, Mexhid Mustafa, Besnik Ferizi, Faton Topanica, Arsim Topanica dhe Ajdar Jashari, është dëgjuar dëshmitarja, Violeta Pllana.

Në seancën e së martës, dëshmitarja Pllana deklaroi se vlera e cigareve pa banderolë të destinuara për KFOR-in, por të cilat u janë shitur kompanive të caktuara private nga ana e të akuzuarve, arrin vlerën 1.8 milionë euro, raporton “Betimi për Drejtësi”.

“Vlera e cigareve duke u bazuar në faturat që i kemi pranuar dhe që ekzistojnë në dosje të lëndës është 1.8 milion euro, kurse sipas përllogaritjes së evazionit nga taksat rezulton se lartësia e taksave është dashur të jetë 1.5 milion euro” tha dëshmitarja Pllana.

Sipas dëshmitares, e cila edhe udhëheq hetimet në shërbimin doganor, pas një periudhe një vjeçare të hetimit dhe vëzhgimit me masa të fshehta, ka rezultuar se personat e përfshirë në aktakuzë kanë shmangur importimin e cigareve të destinuara për KFOR-in.

E njëjta tha se cigaret nuk janë dorëzuar në depon ushtarake në Sllatinë, por janë shitur jashtë bazës ushtarake të KFOR-it.

Po ashtu, dëshmitarja Pllana sqaroi se në bazë të faturave të evidentuara dhe përgjimeve që ishin ndërmarrë ndaj të akuzuarve, kishin marrë njohuri se ka qenë Shaip Ferizi ai i cili e ka organizuar punën për shitjen e cigareve jashtë bazës së KFOR-it.

Sipas dëshmisë së dëshmitares, i akuzuari Ferizi përmes punëtores së tij, Shqipe Avdiu, ka vulosur mallin si të destinuar për KFOR-in, por që në realitet ai mall është shitur jashtë bazës ushtarake në fjalë.

Pllana gjithashtu tha se bazuar në aksionin e bastisjes të ndërmarrë më 8 tetor 2007, kanë arritur që në Sveçël të Podujevës të sekuestrojnë cigare pa banderola, të cilat edhe janë konstatuar në kallëzimin penal të ushtruar pikërisht nga institucionet doganore.

“Oficerët e terrenit  e kanë vëzhgua transportuesin Lulzim Gashi dhe Shaip Ferizin, me ç ‘rast  Lulzim Gashi e ka vozit furgonin me cigare pa banderola, i cili është nisur në drejtim të Podujevës, konkretisht në fshatin Sveçël të Podujevës, ku kemi dhënë urdhrin për bastisje. Aty në Sveçël  malli ka qenë duke u ngarkua prej një furgoni në furgonin tjetër, me ç ‘rast janë sekuestruar cigaret pa banderola të konstatuara edhe në kallëzimin penal”, deklaroi Pllana.

Tutje, dëshmitarja tha se ishin bastisur edhe lokacione tjera si depoja “Pimi Tobaco”, pika 1 dhe 2, të cilat ishin pronë e të akuzuarve Mustafë Vitisë dhe Mexhid Mustafës, pastaj ishin bastisur shtëpitë e të akuzuarve Shaip dhe Besnik Ferizi, Lulzim Gashi, Shqipe Avdiu, për të vazhduar me kontrollimin e dyqanit të të akuzuarit Arben Jashari “Leon World”, ku është sekuestruar një pjesë e mallit, pajisje elektronike kryesisht.

Pllana shtoi se malli i cili destinohet për KFOR-in duhet të shkoj veç në KFOR si destinacion faktik, sepse ai shërben për nevojat e tyre dhe i njëjti lirohet nga taksat doganore.

Sipas dëshmitares në treg shiten vetëm cigaret me banderola, kurse cigaret e parapara për nevojat e KFOR-it janë cigare pa banderola dhe pikërisht ky detaj i dallon nga cigaret që shiten në treg.

Pasi palët nuk kishin propozime tjera për plotësimin e procedurës së provave, trupi gjykues mori vendim për ndërprerjen e seancës të së martës.

Seanca e radhës u caktua të mbahet më 4 dhjetor, me fillim nga ora 9:00.

Ndryshe, në këtë rast është i përfshirë edhe i akuzuari Lulzim Gashi, mirëpo për të është veçuar procedura në seancën e mbajtur më 29 maj të këtij viti, pasi nuk ka qenë e mundur të sigurohet prezenca e tij në gjykatë.

Sipas aktakuzës, Shaip Ferizi, Shqipe Avdiu, Arben Jashari, Mustafë Vitia, Mexhid Mustafa, Lulzim Gashi, Besnik Ferizi, Faton Topanica, Arsim Topanica dhe Ajdar Jashari, që 8 shtatori 2006 e deri më 9 tetor 2007, kanë kryer krim të rëndë si pjesë e një grupi të organizuar kriminal, duke e pasur secili rolin e tyre të ndarë në veprimtari kriminale. Në aktakuzë thuhet se me qëllim të përfitimit të drejtpërdrejtë apo të tërthortë të një dobie pasurore apo financiare të kundërligjshme, gjatë importimit të cigareve si kontraktues të KFOR-it dhe në emër të KFOR-it kanë keqpërdorur detyrat zyrtare.

Me këtë rast, sipas aktakuzës, cigaret në vlerë prej 2.931.929.08 euro nuk i kanë dorëzuar në KFOR, por u kanë shitur kompanive të tjera pa banderolë, duke shkaktuar evazion fiskal ndaj buxhetit të konsoliduar të Kosovës në shumë prej 2,441,927,71 euro.

Prokuroria të akuzuarit Shaip Ferizi, Shqipe Avdiu dhe Arben Jashari, i ngarkon me veprat penale “krim i organizuar”, lidhur me veprën penale “shpërdorim i detyrës zyrtare” si dhe me veprën penale “shmangie mashtruese nga pagesat e detyrimeve”.

Ndërsa, të pandehurit Mustafë Vitia, Mexhid Mustafa, Lulzim Gashi, Besnik Ferizi, Faton Topanica, Arsim Topanica dhe Ajdar Jashari, i ngarkon me veprën penale “krim i organizuar” lidhur me veprën penale “shmangie nga pagesat e detyrimeve”.//Betimipërdrejtësi