Lajm i keq për vizat

Liberalizimi i vizave rrezikon të shtyhet, aq me tepër kur Brukseli asnjëherë nuk ka dhënë afate kohore se kur mund të ndodh liberalizimi.

Procesi i vendimmarrjes për liberalizimin eventual të vizave për Kosovën është në vazhdim e sipër në Këshillin e BE-së, por me kalimin e kohës po bëhet e qartë se ky liberalizim tash më nuk ka gjasa të ndodhë këtë vit.

Madje as miratimi i vendimit këtë vit, me qëllim që liberalizimi të jetësohet në fillim të vitit të ardhshëm, nuk duket real, shkruan sot “Koha Ditore”.

Duket se edhe liderët politikë të Kosovës, të cilët deri para pak javësh garantonin se liberalizimi do të ndodhë deri në fund të këtij viti, tashmë po e ndryshojnë fjalorin dhe po thonë se “deri në fund të vitit mund të merret vendimi” apo “të përmbyllen procedurat”.

Lojë të tillë fjalësh qytetarët e Kosovës kanë dëgjuar çdo ditë që nga viti 2010, por nga ana e Bashkimit Evropian asnjëherë nuk ka përmendur afate kohore, madje as atëherë kur është shprehur se “procesi është në fazën finale”.

Në BE pohojnë se është “tepër herët” që kosovarët të bëjnë tash llogari matematikore se sa vota duhen në Këshill për liberalizim vizash.