Nisi në vitin 2011, ende zvarritet finalizimi i objektit të Administratës në Podujevë

Të gjithë projektin e ndërtimit të objektit të Administratës Komunale në Podujevë e kanë karakterizuar vonesat dhe zvarritjet.

Pritej që pas 7 vitesh prej kur ka filluar ndërtimi i këtij objekti më 1 korrik të këtij viti punëtoret e administratës të kësaj komune të zhvendoseshin në objektin e ri. Por, një gjë e tillë nuk ndodhi as këtë herë.

Në një përgjigje të dhënë nga zyrtarët e Komunës së Podujevës për “Indeksonline”, thuhet që për shkak të defekteve ka qenë e pamundur të vendoset administrata në objektin e ri.

“Ishte planifikuar që administrata komunale në Podujevë të fillojë vendosjen në objekt të ri më 1 korrik të këtij viti, por për shkak të defekteve që janë evidentuar dhe nevojës së riparimit të tyre, ka qenë e pamundur të vendoset administrata në objektin e ri.” thuhet në përgjigje.

Zyrtarët e Komunës fajin për këtë ia lënë kompanisë së kontraktuar “Alba Construcion”, për të cilët thonë se investitorit, Komisionit Evropian iu kanë nisur edhe ankesa.

“Komuna ka bërë ankesa të vazhdueshme lidhur me planin dinamik të riparimeve nga kontraktuesi dhe nënkontraktuesit e tij në objektin e ri të Komunës së Podujevës. Pas shkresave të bëra, investitori i këtij projekti – Komisioni Evropian (KE) ka bërë dy vërejtje me shkrim për kontraktuesin “Alba Construction” janë shprehur zyrëtarët komunal për Indeksonline.

Por, në përgjigjen e Komisionit Evropian për “Indeksonline”, thuhej që ky projekt pritej të përfundohej në dhjetor të vitit 2016, por që ishte dhënë edhe një kohë shtesë prej 12-21 muaj. Dhe obligimi i vetëm i komunave ishte që të sigurojnë lidhje me shërbimet publike, si energjia elektrike, ujë dhe kanalizimi.

“Në memorandumin e nënshkruar në mes të përfituesit, Ministrisë së Administratës Publike dhe kompanisë kontraktuese, thuhet se obligimi i komunave si përfitues të drejtpërdrejt të këtij projekti ishte të siguronte një lidhje me shërbimet publike si furnizimi me energji, ujë dhe kanalizime” thuhet në përgjigje.

Pranimi teknik pritej që në Komunën e Podujevës të bëhej gjatë këtij viti. Por, bazuar në përgjigjen e Komisionit Evropian për “Indeksonline”, thuhet se pritet që Komuna e Podujevës të raportoj për përfundimin e punimeve deri në maj të vitit 2019”

“Pasi të eliminohen të gjitha defektet, ne presim që më në fund të pranojmë raportin për përfundimin e punimeve deri në maj të vitit 2019”, kanë thënë ata.

Po ashtu, njëjtë janë shprehur edhe zyrtarët e Komunës të cilët presin që posa të evitohen defektet, të raportohet te Komisioni Evropian të cilët do të dalin për inspektim.

“Kompania punëkryerëse, posa të evitojë defektet e evidentuara, do të raportojë tek KE dhe ata do dalin ta inspektojnë objektin së bashku me organin mbikëqyrës. Pasi të konstatohet se janë bërë të gjitha riparimet e nevojshme, do fillojë vendosja e administratës në objektin e ri.” thuhet në përgjigjen e Komunës së Podujevës.

Ndryshe, ky projekt në tërësi kapë vlerën e 1 milion eurove dhe ka një sipërfaqe prej 4 mijë metrash katrorë./Indeksonline/