Trajneri Fadil Ademi që punon në ndërrimin e natës

Fadil Ademi është një emër i njohur i futbollit kosovar, raporton Insporti.com.

Ademi vite më parë është dalluar për paraqitjet e tij në fushën e gjelbër teksa ka luajtur si mbrojtës i majtë.

Pasioni për futbollin nuk i është shuar as pas përfundimit të karrierës si futbollist për të shkëlqyer si trajner.

Në edicionin 2010-11 me skuadrën e Hysit që tashmë nuk ekziston, e ka fituar titullin kampion në Kosovë për herë të parë dhe të fundit në histori  të klubit.

Por, karriera si trajner e Ademit nuk ka vazhduar ashtu siç pritej.

Arsyeja është shumë e fortë.  Ai e bënë një punë të tjetër që për Ademin është primare.

Tash e dhjetë vite i punon si gardian në Qendrës Edukuese Korrektuese, në burgun e Lipjanit.

Ademi pas shumë viteve, sot u rikthye si shef i shtabit teknik te Llapit duke e zëvendësuar në këtë pozitë Bylbyl Sokolin që ditë më parë u shkarkua nga klubi.

Ademi mahniti në takimin e parë pasi që Llapi arriti fitore me shifrat 3:1 ndaj Gjilanit.

Nuk e lë burgun për t’u bërë kryetrajner

Ademi rrëfen për Insporti se nuk e ka ndërmend që të vazhdojë me Llapin si kryetrajner, por vetëm si ndihmës. “Dihen projektet dhe ambiciet që ka klubi që kanë të bëjnë me titullin kampion. Unë kam qenë ndihmës i parë i Bylbyl Sokolit dhe më ka takuar mua që ta drejtojë ekipin. Do ta udhëheq Llapin vetëm deri në gjetjen e një trajneri të ri pastaj do të punojë si ndihmës”, ka thënë Fadil Ademi në një prononcim për Insporti.com.

“Tash e dhjetë vite e kam një punë të tjetër si gardian në Qendrës Edukuese Korrektuese, në burgun e Lipjanit. Në aspektin financiar, nuk më konvenon që të largohem nga puna në burg. Për momentin nuk po shikojë se ka shumë përmirësime në futbollin kosovar”, theksoi Agim Ademi.

E mirëkuptojnë kur mungon, kishte super-oferta

Tutje, Fadil Ademi zbulon se një herë në javë nuk mund të shkojë në stërvitjet e Llapit. “Te Llapi mungoi një herë në javë për shkak të orarit që e kam në burg. Në klub më kanë mirëkuptuar pasi që më duhet që të punojë edhe në ndërrimin e natës”, zbulon Fadil Ademi.

Ai në fund zbuloi se pasi që u shpall kampion me Hysin, kishte oferta të shumta. “Kam pasur shumë oferta nga shumë klube në Kosovë pasi që me Hysin u shpalla kampion. Arsyet e refuzimit tashmë po i dini, puna në burg”, përfundoi Fadil Ademi.

Ndryshe, Llapi pas xhiros së dhjetë në IPKO Superligë, ndodhet në vendin e dytë me 19 pikë të tubuara.