Agim Veliu “injoron” Raportin e Auditorit, nuk e dërgon në Asamble për diskutim

Zyra e Auditorit të Përgjithshëm në bazë vjetore kryen auditim të Rregullsisë të Buxhetit të Konsoliduar të Kosovës, për të gjitha institucionet publike përfshirë këtu edhe komunat, transmeton PodujevaPRESS.com

Ndonëse raportet e Auditorit të Përgjithshëm janë të obliguar nga institucionet e përfshira në auditim që të diskutohen dhe rekomandimet të merren parasysh, jo të gjitha institucionet e respektojnë një gjë të tillë.

Komuna e Podujevës është njëra ndër komunat që deri më tash nuk e ka diskutuar Raportin e Zyrës së Auditorit.

Komuna e Podujevës, konkretisht kryetari Agim Veliu nuk e ka dërguar në Kuvendin Komunal që të diskutohet për Raportin vjetor të Auditimit, gjë që i kërkohet edhe me ligj. Kjo është evidentuar nga Zyra Kombëtare e Auditimit në raportin e saj në indikatorët për performancë komunale.

Ligji për Menaxhimin e Financave Publike dhe Përgjegjësitë (me ndryshime) si dhe Ligji për Auditorin e Përgjithshëm dhe Zyrën Kombëtare të Auditimit, obligojnë menaxhmentin e komunës të raportojë mbi veprimet e ndërmarra dhe veprimet e propozuara në lidhje me gjetjet dhe rekomandimet e Auditorit të Përgjithshëm në Raportin Vjetor të Auditimit të pasqyrave financiare të organizatës.

Mirëpo quditërisht as opozita në komunën e Podujevës nuk e ka ngritur këtë çështje, të paktën deri më tani kur jemi në mesin e muajit Tetor./PodujevaPRESS.com/