Katër nga pesë të akuzuarit për narkotikë shpallen fajtorë, të cilët ishin arrestuar në Shakovicë të Podujevës

Gjykata Themelore në Prishtinë, të hënën, i ka shpallur fajtorë katër nga pesë të akuzuarit për vepra penale që lidhen me narkotikë, Mikush Shala, Skender Salija, Gazmend Dobruna dhe Shaban Halimi, kurse të akuzuarin Aziz Hamiti, e ka liruar nga akuza.

I akuzuari Mikush Shala është dënuar me dy vjet e gjashtë muaj burgim dhe me dy mijë euro gjobë, Skender Salija është me dy vjet burgim dhe dy mijë euro gjobë, kurse, Gazmend Dobruna është dënuar me dy vjet e gjashtë muaj burgim dhe Shaban Halimi me dy vjet burgim dhe dy mijë euro gjobë, raporton “Betimi për Drejtësi”.

Ndaj të akuzuarve është shqiptuar edhe dënimi plotësues, që parasheh konfiskimin e sendeve të cilat janë rezultat i kryerjes së veprës penale.

Aktgjykimi është shpallur nga kryetari i trupit gjykues Vesel Ismajli, në prani të akuzuarve dhe mbrojtësve të tyre.

Gjatë shpalljes së aktgjykimit nuk ka qenë i pranishëm prokurori Ilaz Beqiri.

Në seancën fillestare, të akuzuarit Shala, Salihaj dhe Dobruna e kishin pranuar fajësinë, ndërsa të akuzuarit Halimi dhe Hamiti, ishin deklaruar të pafajshëm.

Ndryshe, sipas aktakuzës së ngritur më 23 shkurt 2017 nga Prokuroria Themelore në Prishtinë, të akuzuarit Gazmend Dobruna, Shaban Halimi e Aziz Hamiti më 2 gusht 2016, në fshatin Shakovicë të Podujevës, gjatë kontrollit në veturën e Gazmend Dobrunës nga Policia e Kosovës, janë gjetur dhe sekuestruar 5 kilogramë e 455 gramë sasi të narkotikut që dyshohej të ishte e llojit marihuanë. Po ashtu, gjatë bastisjes në shtëpinë e Dobrunës, janë sekuestruar edhe 700 euro, ndërsa në shtëpinë e Enver Asllanit janë gjetur 17.000 euro para të gatshme.

Sipas prokurorisë, të akuzuarit tjetër Mikush Shalës, më 1 shkurt 2016, në pikën kufitare në Merdar, policia në mbështetësen e ulëses së pasme të veturës, gjeti dhe sekuestroi 13 paketime me substancë narkotike të llojit marihuanë me peshë të përgjithshme prej 12 kilogramë e 208 gramë.

Të akuzuarit, Skender Salilajt, më 2 gusht 2016 i janë gjetur dhe sekuestruar dy thasë me substancë narkotike të llojit marihuanë, me peshë të përgjithshme prej 52 kilogramë e 900 gramë si dhe mjete të punës që janë përdorur për qëllim të paketimit të substancave narkotike. Po ashtu, gjatë kontrollit nga ana e pjesëtarëve të policisë, i janë gjetur dhe sekuestruar edhe një armë dhe një pushkë, të cilat i mbante pa autorizim.

I pandehuri Skender Salihaj, akuzohet edhe për veprën penale “mbajtje në pronësi, kontroll ose posedim të paautorizuar të armëve”.