PODUJEVË: Deklarohen të pafajshëm shtatë të akuzuarit për manipulim me vota në zgjedhjet e vitit 2010

Të akuzuarit Blerim Emini, Ejup Emini, Sami Azemi, Arsim Nazifi, Milazim Berisha, Shkëlzen Jaha dhe Dafina Shabani janë deklaruar të pafajshëm për mashtrim me votime.

Në shqyrtimin fillestar të mbajtur të hënën pranë Gjykatës Themelore në Prishtinë, pas leximit të aktakuzës nga ana e prokurores Javorka Prilinçeviq, shtatë të akuzuarit kanë thënë se nuk e ndiejnë veten fajtorë lidhur me akuzën se në zgjedhjet e vitit 2010, në fshatin Lluzhan të Komunës së Podujevës kanë manipuluar rezultatin zgjedhor, me rreth 534 vota të partive të ndryshme dhe për këtë shkak procesi i votimit është dashur të përsëritet.

Pasi që të akuzuarit nuk e kanë pranuar fajësinë, kryetari i trupit gjykues, gjykatësi Beqir Kalludra, i ka njoftuar ata që brenda afatit ligjor prej 30 ditësh mund të bëjnë kundërshtim për pranueshmërinë e provave dhe kërkesë për hudhjen e aktakuzës.

Shqyrtimi i dytë është caktuar të mbahet më 19 nëntor, duke filluar nga ora 13:00.

Ndryshe, në bazë të aktakuzës së 1 prillit 2015, prokuroria pretendon se më 12 dhjetor të vitit 2010, në fshatin Lluzhan të Komunës së Podujevës, të akuzuarit në cilësinë e anëtarëve të Komisionit Qendror të Zgjedhjeve, të partive të ndryshme politike, në bashkëveprim me njeri tjetrin kanë manipuluar rezultatet e zgjedhjeve.

Sipas prokurorisë, të akuzuarit kanë manipuluar 534 vota të partive të ndryshme dhe për këtë shkak procesi i votimit është dashur të përsëritet.