Mjekët dëshmojnë për momentin kur pranuan për trajtim të vrarin dhe të plagosurin në Podujevë

Në gjykimin në të cilin vëllezërit Fejard dhe Sedat Llugaliu akuzohen për vrasje të rëndë pasi pretendohet se e kanë privuar nga jeta, tani të ndjerin Fahri Bunjakun, në seancën së premtes, kanë dhënë dëshminë  e tyre Bejtush Jashari dhe Istref Plakolli.

Për këtë vrasje, i akuzuar është edhe vëllai tjetër, Esat Llugaliu, mirëpo ndaj tij është veçuar procedura, pasi në natën kur ka ndodhur ngjarja, ka pësuar lëndime trupore të rënda me pasoja të përhershme për shëndetin.

Dëshmitarët Jashari dhe Plakolli, janë ftuar që në cilësinë e mjekëve kujdestarë të dëshmojnë për rastin e pranimit të të plagosurit Esat Llugaliu dhe të plagosurit tjetër, tani të ndjerit Fahri Bunjaku, në qendrën mjekësorë të Podujevës,  natën kritike të 7 shkurtit 2016.

Jashari dhe Plakolli, ishin mjekët e vetëm kujdestarë, kur në qendrën e tyre mjekësore në Podujevë u paraqitën për të marrë ndihmë mjekësorë i akuzuari Esat Llugaliu dhe tani i ndjeri Fahri Bunjaku.

Dëshmitari Istref Plakolli deklaroi se natën kritike në oborrin e emergjencës kishte dëgjuar dy persona që kërkonin ndihmë mjekësore për një person të plagosur rëndë, i cili ishte i dëmtuari Esat Llugaliu.

“Në oborrin e emergjencës e kemi pa një person të plagosur rëndë dhe ishte nën përcjelljen e dy personave tjerë, të cilët kërkonin ndihmë për të. Me ndihmën e tyne e kemi nxjerr atë person prej veture, ai ka qenë në pjesën e pasme të veturës dhe e kemi bartur së bashku me këta dy personat në dhomën e reanimimit”, tha dëshmitari Plakolli.

Tutje dëshmitari Plakolli deklaroj se përderisa  qëndronin në dhomën e reanimimit , i kishte pyetur dy personat që e shoqëronin të plagosurin se çfarë afërsie kishin ata me të lënduarin.

“Personat që e kane sjellë, i kam pyet çfarë afrie keni me pacientin. Njoni m’ka thon që e kam vëlla” shtoi Plakolli.

Dëshmitari Plakolli deklaroi se njëri prej shoqëruesve ishte i armatosur, por të njëjtin nuk e kishte pyetur se për çfarë arsye mbante revolen, pasi thotë se ishte frikësuar për jetën e tij në ato momente.

“Personi që ka qenë në anën e djathtë, kur kam tentu me nxjerr pacientin, krahi i im ka prek në revolen e tij, të cilën e kish pas mbrapa në shpinë. Unë ja kam prek revolen e normal edhe që jam friku me pyet, se n’ksi raste mundet me mu rreziku jeta” deklaroi Plakolli.

Po ashtu, dëshmitari Plakolli deklaroj se pas dërgimit të të plagosurit në Prishtinë, diku pas 25 minutave në Qendrën emergjente të Prishtinës, ishte sjell për t’u trajtuar edhe tani i ndjeri Fahri Bunjaku.

Sipas Plakollit, tani i ndjeri Fahri Bunjaku, kishte gjendje të rënduar shëndetësore, kishte shenja të dobëta jete. Sipas tij, i njeri Bunjaku kishte plagë në pjesën abdominale të trupit, por plaga më e rrezikshme sipas mjekut ishte ajo në pjesën e femurit.

“Gjendja e tij ka qenë shumë e rëndë, ka qenë në gjendje të arrestit,  në komë edhe pa puls, pastaj ka pasuar reanimimi i shpejt dhe është kthyer në jetë. Ai ka pasur plagë sa e kujtoj në pjesën abdominale, plaga hyrëse ka qenë në anën e djathtë, një plagë ka qenë shumë ma e rrezikshme në kofshë në pjesën e femurit që ka shkaktu gjakderdhje të madhe”, tha Plakolli.

Po ashtu në shqyrtimin e së premtes paraqiti dëshminë e tij edhe dëshmitari Bejtush Jashari.

Dëshmitari Jashari, ishte mjeku i cili u përkujdes për dhënien e ndihmës së parë për  tani të ndjerin Fahri Bunjaku, në qendrën emergjente në Podujevë, dhe i njëjti ishte në kujdestari së bashku me Istref Plakollin.

Sipas Jasharit, natën kritike kanë pranuar dy pacientë me gjendje të rënduar shëndetësore. Ai deklaroj se kur kishte marrë përsipër kurimin e tani të ndjerit Fahri Bunjnaku, i njejti kishte dhimbje, gjakderdhje dhe ka qenë i vetëdijshëm.

Ai shpjegoi se janë përgjegjës vetëm për ofrimin e ndihmës së parë, dhe menjëherë pasi kanë vërejtur se jeta e pacientit është në rrezik për jetë, janë përkujdesur që të bëjnë transportimin e tij për në QKUK.

“Më kujtohet se ka pas plagë me armë të zjarrit, ka qenë i vetëdijshëm e i përgjakun, ka thon se kam shumë dhimbje, gjakderdhje. Menjëherë jemi marr me përgatit për transport në QKUK,  se në qendrën tonë s’mujm mi ofru ndihmë tjetër veç ndihmës së parë” shtoi Jashari.

Tutje, dëshmitari Jashari nuk ishte në gjendje të bënte përshkrimin e saktë të plagëve të marra nga tani i ndjeri Bunjaku, pasi sipas tij ka kaluar kohë e gjatë dhe se nuk mban mend me saktësi detaje të tilla.

“Kur ndodh një rast i tillë, është gjendje alarmante, është rrezik me dal gjendja prej kontrolli, s’ki kohë mu marr me sene tjera që s’janë primare”, tha Jashari.

Kryetarja e trupit gjykues, gjykatësja Valbona Selimaj deklaroj se dëshmitarët Vedat Haliti, Agron Pajaziti dhe Fehmi  Cakiqi mungojnë në seancën e sotme , dhe se për të njëjtët nuk janë kthyer fletëkthesat, me ç’rast gjykata konstatoi se thirrja nuk është bërë në mënyrë të rregullt

Në pamundësi për të proceduar tutje, gjykatësja Valbona Selimaj mori vendim për ndërprerjen e shqyrtimit gjyqësor.

Seanca e radhës u caktua të mbahet më 2 nëntor duke filluar nga ora 9.

Ndryshe, sipas aktakuzës më 7 shkurt të vitit 2016, rreth orës 21:40 minuta, në rrugën e “Xhamisë” në Podujevë, pas marrëveshjes paraprake mes të pandehurve dhe personave NN, me dashje që ta privojnë nga jeta tani të ndjerin Fahri Bunjaku, nga hakmarrja për shkak të konflikteve të mëhershme të familjes Lugalliu dhe Bunjaku rreth biznesit, duke rrezikuar edhe Arafat Fetën, të pandehurit u kanë dal në pritë Fetës dhe Bunjakut.

Sipas aktakuzës, Esat Llugaliu, ka shtënë në drejtim të tyre me pistoletë dhe bashkë me të kanë shtënë edhe personat NN dhe të pandehurit Fejard dhe Sadat Llugaliu që kanë dal nga vetura e tyre, kurse personat NN kanë qene të fshehur në qoshe të një ndërtese.

Për të shpëtuar nga të shtënat me armë, aktakuza thotë se Feta ka dal nga vetura dhe ka ikur, kurse, tani i ndjeri Fahri Bunjaku është qëlluar me armë zjarri dhe në atë gjendje ka dal nga vetura, por pasi të shtënat nuk janë ndalur në vetëmbrojtje ka shtënë në drejtim të tyre dhe ka ikur drejtë shtëpisë së të dëmtuarit Halit Kika.