Mungon prokurori dhe njëri nga të akuzuarit, shtyhet gjykimi për vrasje në tentativë në Podujevë v.2012

Mungesa e prokurorit Valdet Gashi, si dhe e njërit nga të akuzuarit, Bashkim Mulolli, ka bërë që të dështojë seanca e paraparë të mbahet të hënën, ku Mulolli akuzohet për vrasje në tentativë dhe armëmbajtje pa leje.

Përveç tij, në këtë rast akuzohet edhe Pashtrik Gërguri, për veprën penale “dhënia e ndihmës kryerësve pas kryerjes së veprës penale”, raporton “Betimi për Drejtësi”.

Përveç të akuzuarit Mulolli, nuk ishte prezent as mbrojtësi i tij, avokati Arlind Jupolli, i cili në seancën e kaluar kishte deklaruar se i mbrojturi i tij nuk mund të prezantojë në atë seancë për shkak të gjendjes shëndetësore. Megjithatë, gjykatës i ka prezantuar vetëm një udhëzim për konsultim të lëshuar nga QKUK – ja dhe jo një raport shëndetësor shtesë.

Ndërsa, për prokurorin Gashi, kryetarja e trupit gjykues, gjykatësja Shadije Gërguri, deklaroi se ka qenë i njoftuar për seancën e së hënës, por nuk e ka arsyetuar mungesën.

Gjykatësja, konstatoi prezencën e të akuzuarit të dytë, Pashtrik Gërguri, i cili akuzohet se e ka ndihmuar kryerësin e veprës penale, pasi që rastin nuk e ka paraqitur në polici apo prokurori.

I akuzuari Pashtik Gërguri, kërkoi nga gjykata që për seancën e radhës t’i caktohet një avokat sipas detyrës zyrtare, meqë do ta revokojë autorizimin e dhënë mbrojtësit të tij, për shkak të kushteve ekonomike.

Seanca e radhës për këtë çështje penale u shty për kohë të pacaktuar, derisa të sigurohet njoftim për gjendjen shëndetësore të të akuzuarit Bashkim Mulolli.

Sipas aktakuzës, Bashkim Mulolli, më 13 tetor 2012, në fshatin Shajkovc të Podujevës, me dashje, ka ndërmarrë veprime të drejtpërdrejta për kryerjen e vrasjes së të dëmtuarit Milot Hasani, por veprën nuk e ka përfunduar.

Siç pretendon prokuroria, i akuzuari Mulolli, e ka ndalur veturën e tij, para veturës së të dëmtuarit dhe ka shkuar tek ai, e ka hapë xhamin e derës dhe nga hapësira e saj i është drejtuar me ton kërcënues, me pyetjen “çka po lyp ti knena?”.

Pastaj, siç thuhet në aktakuzë, i akuzuari, e ka futë dorën brenda veturës dhe me kondakun e pistoletës e ka goditur një herë të dëmtuarin, duke i shkaktuar lëndime të lehta trupore, në formë të plagëve ndrydhëse shqyese në kokë, si pjesë vitale të trupit. Ndërsa, kur i dëmtuari ka tentuar t’ia marrë pistoletën nga dora, i akuzuari ka shkrepur një herë në drejtim të tij dhe i ka shkaktuar plagë në nëngjurin e majtë.

Në aktakuzë thuhet, se me këtë rast, dëshmitari Alban Thaçi, ka dalë nga vetura e të dëmtuarit dhe ka shkuar tek i akuzuari duke i kërkuar të mos shkrepë me pistoletë dhe e ka larguar nga aty, kurse i akuzuari është kthyer në veturën e tij dhe është nisur në drejtim të Batllavës.

Sipas aktakuzës, i dëmtuari, nga dhembjet e pësuara, ka dalë nga vetura prej derës së përparme të djathtë, por është rrëzuar 2.3m larg saj dhe është kthyer sërish aty me ndihmën e dëshmitarit Bujar Jashari, kurse dëshmitari tjetër Alban Thaçi, e ka dërguar të dëmtuarin në emergjencën e Podujevës, ku i është ofruar ndihma e parë. Më pas, me autoambulancë është transportuar në QKUK në Prishtinë dhe pas ndërhyrjes mjekësore ka arritur t’u mbijetojë plagëve të marra, me ç’rast dhe vepra penale ka ngelë në tentativë.

Me këtë, i akuzuari, sipas aktakuzës, ka kryer veprën penale “vrasje në tentativë”, nga neni 146 lidhur me nenin 20 të KPK – së.

I akuzuari Bashkim Mulolli, sipas prokurorisë ka kryer edhe veprën penale “mbajtja në pronësi të paautorizuar të armëve” nga neni 374, par. 1 i KPK– së.

Kjo sepse, në aktakuzë thuhet se, i njëjti, pa leje valide për mbajtjen e autorizuar të armëve, në shtëpinë e tij, në fshatin Shajkovc të Podujevës, deri më 13 tetor 2012, ka mbajtë në pronësi pistoletën e markës së panjohur, ndërsa deri më 13 nëntor 2012, ka mbajtë në pronësi pistoletën “TT”, e cila i është konfiskuar gjatë arrestimit të tij në Prishtinë.

Ndërsa, i akuzuari i dytë, Pashtrik Gërguri, sipas aktakuzës, e ka ndihmuar kryerësin e veprës penale, në atë mënyrë që ka heshtur për identitetin e të akuzuarit, duke mos e paraqitur në polici, përkatësisht prokurori.

Me këtë, prokuroria pretendon, se ai e ka kryer veprën penale “dhënia e ndihmës kryerësve pas kryerjes së veprës penale” nga neni 305, par. 2 i KPK – së./Betimi për Drejtësi/