Kjo është çështja që po i bashkon të gjitha partitë politike në Podujevë (Dokument)

Zgjerimi i rrugës Prishtinë-Podujevë, po shkon me ritëm të ngadaltë. Në fillim të majit të këtij viti kishte filluar zgjerimi i segmentit “Luzhan-Gllamnik”, me gjatësi prej katër kilometra, derisa ende nuk është as përafërsisht gati që të kryhen punimet, transmeton PodujevaPRESS.com

Kjo po i nervozon qytetarët e Podujevës të cilët kalojnë çdo ditë në këtë rrugë, e cila krijon kolona me kilometra si pasoj e punimeve të ngadalta.

Qytetarët shprehen të zhgënjyer me ritmin e punimeve duke thënë se është e pakuptimtë që ky segment që po zgjerohet të zgjasë kaq shumë.

Kjo ka shtyrë dy asambleistët e PDK-së në Podujevë Arbër Blaku dhe Fatmir Rudari që ta thërrasin një seancë të jashtëzakonshme për ditën e mërkurë, duke mbledhur nënshkrimet e 14 asambleistëve të të gjitha subjekteve politike që janë të përfaqësuara në kuvendin komunal.

Në njoftimin e asambleistit Blaku thuhet:

Të nderuar qytetar të Podujevës,

Me iniciativë nga unë Arbër Blaku dhe Fatmir Rudari, dhe mbeshtetjen e të gjithë grupit të asambleisteve të PDK dhe të të gjitha partive politike të përfaqësuar në KK Podujevë (për të cilët shprehi falenderim për gadishmërinë për të punuar për të mirën e Podujevës, pa dallime politike), kemi thirrur seancë të jashtzakonshme ne lidhje me “Zvarritjen në zgjerimin e rrugës Podujevë – Prishtinë” Seanca do të ketë karakter informues dhe mundësi të ndikimit në Ministrin e Infrastrukturës në përshpejtimin e punimeve të rrugës. Seanca do të mbahet me datën 12.09.2018 ora 10:00. /PodujevaPRESS.com/