SKANDALOZE: Komuna e Podujevës e paguan operatorin me 52,384€, inventari askund

Realizimi i pagesave pa pranim të mallrave në komunën e Podujevës sipas raportit të Auditorit për vitin 2017, thuhet se është tejet shqetësuese, transmeton PodujevaPRESS.com

Për projektin “Inventarizimi i objektit të ri komunal” në vlerë 74,092€, komuna kishte kryer pagesën e parë në vlerë 61,124€ në dhjetor 2017.

“Ne kemi ekzaminuar në teren gjendjen e këtij inventari dhe konstatuam se menaxheri i kontratës kishte nënshkruar specifikat për pranim të inventarit edhe pse pjesa më e madhe e tij nuk gjendej në objektin e ri komunal. Sipas zyrtarëve, inventari nuk ishte pranuar në tërësi meqë në objektin e ri kishte pasur rrjedhje uji dhe inventari gjendej në mobilierinë e kontraktuar. Në lëndë nuk kishte ndonjë dokument që vërtetonin krijimin e kushteve të tilla, raportimin e gjendjes apo dokumente që vërtetonin se inventari gjendet tek operatori apo që pronësia i takon komunës. Vlera për inventarin që nuk ishte në objekt por për të cilin ishte kryer pagesa, ishte 52,384€”, thuhet në raport.

Rreziku sipas raportit të Auditorit thuhet se:

“Kryerja e pagesave në mungesë të pranimit faktik të mallrave apo punëve bie ndesh me rregullat financiare për shpenzimin e parave publike dhe përbën rrezik të vazhdueshëm që komuna të humb paratë e dhëna. Gjithashtu, veprimet e tilla lënë hapësirë për dyshime se komuna përfshihet në marrëveshje verbale joligjore me Operatoret Ekonomik (OE) vetëm në mënyrë që pagesat të iu kryhen sa më parë operatorëve”, pårfundon raporti./PodujevaPRESS.com/