Për vërshimet në Podujevë, banorët e fajësojnë komunën për mosrregullim të shtratit të lumit

Ka pothuajse tri javë që banorët e lagjes Shala dhe Tovërlani të Podujevës po ballafaqohen me vërshime.

Uji është grumbulluar në pronat e tyre dhe për pasojë kanë mbetur të bllokuara rreth 30 shtëpi. Banorët fajin për vërshimet ia lënë mosrregullimit të shtratit të një përroske dhe një ure mbi të.

Thonë se sa herë ka reshje shiu ballafaqohen me të njëjtën situatë dhe dëmet, sipas tyre, mund të jenë edhe më të mëdha nëse nuk intervenon komuna.

Zyrtarë të Komunës së Podujevës kanë thënë se tashmë drejtoritë përgjegjëse janë bërë bashkë për të intervenuar.

Banorët kanë paralajmëruar protesta dhe bllokim të magjistrales Prishtinë-Podujevë në rast se komuna nuk intervenon./Koha.net/