Nderohen me mirënjohje mësimdhënësit llapjanë në Ditën e Mësuesit

Komuna e Podujevës, me një manifestim të organizuar në Sallën e Tetarit “Avdush Hasani” ka shënuar 7 Marsin – Ditën e Mësuesit, me ç’rast me mirënjohje janë nderuar veteranë të arsimit dhe mësimdhënës të dalluar, thuhet në njoftimin për media të kësaj komune, transmeton PodujevaPRESS.com

Në manifestim e organizuar për nder të 7 Marsit – Ditës së Mësuesit, nënkryetari i Komunës së Podujevës, Nexhmi Rudari, ka uruar mësimdhënësit llapjanë dhe ka ndarë mirënjohjet, me të cilat i ka nderuar kryetari Agim Veliu mësimdhënësit e dalluar dhe ata që kanë shkuar në pension, si dhe ka ndarë mirënjohje post-mortum për mësimdhënësit që kanë ndërruar jetë brenda vitit të fundit kalendarik.
Nënkryetari Rudari foli rrugëtimin dhe zhvillimin e sprovat nëpër të cilat kaluan mësimdhënësit, që nga hapja e shkollës së parë shqipe.
“Dita e Mësuesit- 7 Marsi, është dita e misionarëve që përhapin dijen, edukojnë dhe mësojnë brezat ndër shekuj. Në shënim të kësaj dite kujtojmë sakrificat e mëdha në rrugën e dijes dhe të lirisë. Kujtojmë 7 marsin e vitit 1887, kur u hap mësonjëtorja e parë shqipe e Korçës, e cila bëri të mundur që dituria dhe mendja e ndritur e kombit tonë ta përmbyste përgjithmonë heshtjen dhe asimilimin, që të tjerët padrejtësisht me shekuj na kishin imponuar”, tha nënkryetari Rudari.

Këtë manifestim e kanë begatuar me një program artistik Kori i Gjimnazit “Aleksandër Xhuvani”, Grupi i Baletit dhe Vallëzimit “Ana’s dance” dhe Shkolla për Kitarë “Mirela”, përfundon njoftimi i zyrës për informim./PodujevaPRESS.com/