Flasin nga AKR-ja, tregojnë se a ka ndikim përçarja brenda Vetëvendosjes në punën e Komunës së Prishtinës!

Asamblisti nga radhët e Aleancës Kosova e Re (AKR), Sami Boroci ka folur për atë se a ka ndikuar përçarja në Vetëvendosje edhe në punën që po bëhet në Komunën e Prishtinës.

Boroci tha për “Gazeta Blic”, se deri tani problemet brenda partisë Vetëvendosjes, nuk kanë ndikuar në koalicionin qeverisës, por ai nuk ka përjashtuar mundësinë që në të ardhmen edhe mund të ketë ndikim.

“Deri më tani nuk kemi vërejtur se situata e re e krijuar në LVV të ketë ndikuar shumë në punën e koalicionit qeverisës, të ardhmen edhe mund të reflektoj!”, ka thënë ai.

Boroci i AKR-së ka folur edhe për koalicion i cili është arritur që katër muaj, mes e VV-së e AKR-së në Komunën e Prishtinës.

Ai ka thënë se është e rëndësishme që koalicioni i tyre ka shumicën në Kuvend dhe se në këtë mënyrë do të shmangen tendencat për bllokada.

“Koalicioni që kemi ndërtuar me LVV dhe partitë tjera po funksionon mirë deri më tani, është e rëndësishme që këtë mandat koalicioni ynë ka shumicën në Kuvend, rrjedhimisht do të shmangen tendencat eventuale për bllokada. Mendoj se dinamika e punës ende nuk është e duhura, por së shpejti do të fillohet të implementohen pikat programore të koalicionit tonë”, tha ai.

I pyetur përse sot është refuzuar votimi i raportit financiar për vitin 2017 nga ana e asamblistëve, Boroci ka thënë se ky raport ka pasur mungesa të theksuara të informatave.

“Raporti Financiar për vitin 2017 është kthyer mbrapa nga Asambleistët sepse ka pas mangësi në mënyrën e prezentimit të të dhënave, nuk ka qenë konform ligjit për financat publike, ka pas mungesë të theksuar të informatave dhe përshkrimeve të nevojshme në lidhje me inkasimin dhe shpenzimin e paras publike, andaj ne kemi kërkuar që raporti të detajizohet dhe të sillet sërish në Kuvend”, ka përfunduar ai, përcjell Gazeta Blic.

Në anën tjetër në ditën e sotme, me 33 vota kundër, 9 për e 3 abstenime, Kuvendi i Komunës së Prishtinës e ka kthyer mbrapshtë raportin buxhetor të ekzekutivit për tremujorin e katërt për vitin 2017.

E kundër raportit votuan edhe një pjesë e konsiderueshme e asamblistëve të Vetëvendosjes si dhe partnerëve të koalicionit qeverisës. Ndërsa, në këtë seancë, me shumicë votash është miratuar fillimi i hartimit të Planit Zhvillimor “Prishtina 2018-2026” dhe fillimi i hartimit të hartës zonale të kryeqytetit.