Rrjeti i Grave të Kosovës reagon pas lirimit të të akuzuarit për vrasjen e Donjeta Pajazitit

Naser Pajaziti nga Strellci ka dalë i pafajshëm nga Gjykata e Pejës për akuzat se vrau kushërirën e tij 24-vjeçare, Donjeta Pajaziti.

Krimi kishte ndodhur në nëntor të vitit 2015, ndërsa trupi i pajetë i viktimës është gjetur gati dy muaj pas vrasjes, diku në malet e fshatit Strellc të Deçanit.

LEXO EDHE: Lirohet i akuzuari për vrasjen e Donjeta Pajazitit

E njëjta gjykatë, të martën e ka dënuar me 2 vjet e katër muaj dënim unik Naser Pajazitin, për dy vepra penale të armëmbajtës pa leje.

“RrGK dhe në përgjithësi shoqëria kosovare janë dëshmitarë të dështimeve të sistemit të drejtësisë në zbardhjen e rasteve të vrasjeve të grave dhe vajzave”, thuhet në reagimin e grave.

“Prandaj, përmes këtij reagimi RrGK përsëri u bën thirrje institucioneve të drejtësisë të vazhdojnë hetimin në lidhje me vrasjen e Donjeta Pajazitit. RrGK beson që vetëm me vendime të drejta organet e drejtësisë mund të ndikojnë në uljen e dhunës, respektivisht krimit”, thekson reagimi.

Sipas RRGK, “ngritja e përgjegjësisë institucionale gjatë trajtimit të dhunës me bazë gjinore do të rrisë raportimin e këtyre rasteve, duke u siguruar të ketë drejtësi, mbrojtje dhe rehabilitim për rastet e dhunës me bazë gjinore”.

Rrjeti i Grave të Kosovës është rrjet i 126 organizatave të ndryshme të të drejtave të grave në gjithë Kosovën që synon të mbrojë, promovojë dhe mbështesë të drejtat e grave dhe vajzave.